Qaraǵandyda úıdiń neden jarylǵany belgili boldy

QARAǴANDY. KAZINFORM — Qaraǵandylyq tótenshe jaǵdaı mamandary jer úıde bolǵan jarylystyń aldyn ala sebebin aıtty. 

Oblystyq TJD qutqarýshylary oqıǵa ornynda úıindini bólshektep jatyr.

«Jarylǵan úıdiń úıindisiniń arasynan 5 lıtrlik eki gaz ballony tabyldy. Onyń bireýi jarylǵan. Bul gaz jarylǵany týraly boljamdy shamamen dáleldeıdi. Jumys jalǵasyp jatyr» dep habarlady TJM baspasóz qyzmetinen.  

Eske sala keteıik, búgin tańǵy 03:30 shamasynda Qaraǵandy qalasynda eki otbasyna arnalǵan turǵyn úıde jarylys boldy.

Úıdi jylytatyn bý qazandyǵy jarylyp, saldarynan ǵımarat opyrylyp qalǵan.  

TJD kúshimen úıindi astynan 1966 jyly týǵan er adam men 2008 jyly týǵan qyz bala shyǵarylyp, medıtsınalyq jedel járdem brıgadasyna berildi.