Qaraǵandyda ushaq qulaǵan aımaq qorshaýǵa alyndy - foto
QARAǴANDY. KAZINFORM - Qaraǵandy oblysynda apatqa ushyraǵan Sý-30SM joıǵysh ushaǵy qulaǵan orynnan Kazinform agenttiginiń tilshisi túsirgen alǵashqy eksklıýzıvti kadrlardy usynamyz.
Ushaq áýejaıdan shamamen batysqa qaraı 2 shaqyrym jáne Qaraǵandy qalasynan 26 shaqyrym jerde qulaǵan.
Tańerteń óńirde kún ashyq bolǵan, aınala jaqsy kóringen edi. Aldyn ala málimet boıynsha, aýa raıy jaǵdaılary josparly oqý-jattyǵý ushýlaryn oryndaýǵa kedergi keltirmegen.
Qorǵanys mınıstrliginiń habarlaýynsha, josparly oqý-jattyǵý ushýlaryn oryndaý kezinde apatqa ushyraǵan Sý-30SM joıǵysh ushaǵynyń ekıpajy der kezinde katapýltamen sekirip úlgergen.
Vedomstvodan eki ushqyshtyń da tiri ekeni, olardyń ómiri men densaýlyǵyna qaýip joq ekeni habarlandy. Qazirgi ýaqytta ushqyshtar dárigerlerdiń baqylaýynda.
Qulaý aımaǵy qorshaýǵa alynǵan. Turǵyndar men ınfraqurylym nysandaryna qaýip joq.
Azamattyq reıster shtattyq rejımde oryndalyp jatyr, toqtatylǵan joq.
Oqıǵanyń sebepteri men mán-jaıyn anyqtaý úshin Qazaqstan Respýblıkasy Qorǵanys mınıstrliginiń arnaıy komıssııasy quryldy. Komıssııany ushý qaýipsizdigi departamentiniń basshysy basqarady. Onyń quramyna avıatsııa qyzmetiniń beıindi mamandary engizilgen.
Osyǵan deıin Qaraǵandy oblysyndaǵy ushaq apatynyń birneshe sebebi atalǵan bolatyn.