Qaraǵandyda týrıstik kompanııa 34 azamattyń 52 mıllıon teńgesin qoldy qylyp, aldap soqqan

ASTANA. KAZINFORM – Qaraǵandy qalasynda saıahattaýǵa nıetti 30-dan astam adamǵa san soqtyrǵan,  týrıstik agenttiktiń ıesi ustaldy. Bul týraly Polisia.kz jazdy. 

— Qaraǵandyda 53 jastaǵy azamatsha polıtsııaǵa aryzdandy. Ol týrıstik agenttik ıesiniń alaıaqtyq áreketteriniń qurbany bolǵanyn málimdedi. Áıel kópten kútken demalysyn uıymdastyrý úshin týragentke 900 myń teńge bergen, alaıda ýáde etilgen sapar júzege aspaı qalǵan, — delingen habarlamada.

Atalǵan derek boıynsha sotqa deıingi tergeý bastaldy. Tergeý barysynda bul agenttikke qatysty osyndaı taǵy birneshe shaǵym tirkelgeni anyqtaldy. Qazirgi ýaqytta polıtsııaǵa osy týrıstik agenttiktiń qyzmetine shaǵymdanǵan taǵy 34 azamattyń ótinishi túsken.

Kúdikti óz áreketin valıýta baǵamynyń kúrt ósýimen jáne sonyń saldarynan týyndaǵan qarjylyq qıyndyqtarmen túsindirgen. Tergeý málimetinshe, jábirlenýshilerge keltirilgen jalpy materıaldyq zalal shamamen 52 mıllıon teńgeni quraıdy. Tergeýdiń obektıvti ári jan-jaqty júrgizilýin qamtamasyz etý maqsatynda kúdikti ýaqytsha qamaýǵa alyndy.

Buǵan deıin Aqmola oblysynda týrıstik fırmanyń basshysy alaıaqtyq jasady dep kúdikke ilingen edi.