Qaraǵandyda túlekter UBT qarsańynda mektepsiz qaldy
QARAǴANDY. KAZINFORM — Qaraǵandyda lıtsenzııa ala almaǵan jekemenshik mekteptiń aınalasynda daý týyndady. Sonyń saldarynan júzden astam joǵary synyp oqýshysy vtrntg bitirý emtıhandaryna sanaýly aı qalǵanda oqý ornyn shuǵyl aýystyrýǵa májbúr.
Mekteptiń jabylatyny týraly ata-analar úshinshi toqsannyń sońynda, ótken senbide bolǵan jınalysta habardar bolǵan. Ásel Shymyrbekovanyń qyzy 11-synypta oqıdy, bul aqparat olar úshin kútpegen jaǵdaı bolǵan.
— Balalar qyrkúıek aıynan beri osynda bilim alyp júr, úlgerimderin jaqsartty, beıindik pánderin tańdady. Biz UBT-ǵa, bilim grantyna daıyndalyp jatyrmyz. Ótken aptanyń sońynda úshinshi toqsannyń sońynda mekteptiń lıtsenzııadan ótpegenin jáne memlekettik mektepterge aýysýymyz kerektigin habarlady, — deıdi ol.
Ata-analardyń sózinshe, másele tek oqý úderisinde emes, jasóspirimderdiń psıhologııalyq jaı-kúıine de áser etip otyr. Alty aı ishinde synyp ujymdary qalyptasyp, muǵalimdermen baılanys ornaǵan, kóptegen oqýshy dál osy ortada óz qabiletin ashqan. Endi olar jańa ortaǵa beıimdelýge, barlyq pán boıynsha BJB men TJB-ny jedel tapsyrýǵa jáne kúızelis jaǵdaıynda qorytyndy attestatsııaǵa daıyndalýǵa májbúr.
Kópbalaly áke Rahat Dúısenbaev otbasy qarjylyq júktemege qaramastan jekemenshik mektepti sanaly túrde tańdaǵanyn aıtady.
— Lıtsenzııa rásimdeý júrip jatqanyn bildik. Senim arttyq. Qazir mektep basshylyǵyn aıyptap otyrǵan joqpyz, biraq bilim basqarmasy men ákimdikten lıtsenzııa alý máselesinde qoldaý kórsetýdi suraımyz. Bul — 10–11-synyp oqýshylary, bitirýshi synyptar. Úsh-tórt aı ǵana qaldy. Olar oqý jylynyń ortasynda birden aýysyp, tez beıimdele almaıdy, — deıdi ol.
Ata-analardyń málimetinshe, mektepte 164 oqýshy bilim alǵan, qazir shamamen 135 bala qalǵan, olardyń basym bóligi — joǵary synyp oqýshylary. Quryltaıshylar ǵımarattyń arnaıy mektep retinde salynǵanyn, jer teliminiń nysanaly maqsaty sáıkes ekenin, sanıtarlyq jáne órt qaýipsizdigi talaptarynyń saqtalǵanyn atap ótti.
«Samga high school» jekemenshik mektebiniń dırektory Álisher Jaqsylyq seriktestiktiń 2025 jylǵy 13 mamyrda tirkelgenin aıtty. «Bilim týraly» zańnyń 40-babyna sáıkes lıtsenzııa alty aı ishinde alynýy tıis. Alaıda qujattardy jınaý rásimderiniń uzaqqa sozylýyna baılanysty belgilengen merzim saqtalmaǵan.
— Merzimniń buzylǵanyn moıyndaımyz. Bul — bizdiń kásipkerlik táýekelimiz. Qazirgi ýaqytta sot protsesi júrip jatyr. Basqa seriktestik arqyly lıtsenzııa alýǵa qaıta ótinish berýdi josparlap otyrmyz. Oǵan deıin balalardy oqytýǵa zańdy quqyǵymyz joq, — dedi dırektor.
Onyń aıtýynsha, quryltaıshylar túlekterdi tústen keıin UBT-ǵa tegin daıyndaýdy jalǵastyrýǵa jáne oqýshylardy ózge mektepterge ornalastyrýǵa járdemdesýge daıyn.
Qalalyq bilim bóliminde, ata-analardyń qalaýyn eskere otyryp, oqýshylardy turǵylyqty jeri boıynsha da, tutas synyptarymen de kóshirýge ázir ekenderin málimdedi. Qaraǵandy qalasynyń bilim bóliminiń basshysy Esentaı Áshim oqýshylar úshinshi toqsandy aıaqtap, aǵymdaǵy baǵalaryn rastap, memlekettik mektepterde oqýyn teń jaǵdaıda jalǵastyra alatynyn jetkizdi.
— Balalar úshin qolaıly psıhologııalyq jaǵdaı jasalady. UBT-ǵa daıyndyq múmkindigi basqa oqýshylarmen birdeı qamtamasyz etiledi, — dep atap ótti ol.
Sonymen qatar balama nusqa retinde «Dostyq» jekemenshik mektebine aýystyrý múmkindigi qarastyrylyp jatyr. Atalǵan mektep oqýshylardy tutas synyptarymen qabyldaýǵa daıyn ekenin bildirgen. Alaıda bul usynyspen barlyq ata-ana kelise bermeıdi.
— Bizge baǵalardy rastaý úshin aýysý usynylady. Alaıda bul mektepte sanıtarlyq jáne órt qaýipsizdigi talaptary saqtalǵan. Másele tek lıtsenzııa merziminde bolyp otyr. Nege formaldy sebepke baılanysty 140–180 bala mektep aýystyrýy kerek? — deıdi ata-anardyń biri Serik Ahmetov.
Qazirgi tańda bul másele sheshilmegen kúıi qalyp otyr. Bir tarap úshin bul — zań talaptaryn saqtaý máselesi bolsa, ekinshi tarap úshin — oqý jylynyń sheshýshi kezeńinde turaqtylyqsyz qalǵan túlekterdiń taǵdyry.
Buǵan deıin Atyraý qalasy «Birlik-2» yqshamaýdanyndaǵy 600 oryndyq mekteptiń qurylysy 4 jylǵa sozylyp ketkenin habarlanǵan bolatynbyz.