Qaraǵandyda trotýarda ketip bara jatqan eki adamdy kólik qaǵyp ketti

QARAǴANDY. KAZINFORM - Qaraǵandyda jeńil kólik trotýarǵa shyǵyp ketip, eki adamdy qaqty. Bir adam oqıǵa ornynda kóz jumdy, dep habarlaıdy Qaraǵandy oblystyq polıtsııa departamentiniń baspasóz qyzmeti.

Oqıǵa 31 naýryz kúni shamamen saǵat 23:00-de Buqar jyraý dańǵyly boıynda boldy. Audi avtokóliginiń júrgizýshisi Dúısenbekov kóshesine qaraı baǵyt alyp kele jatyp, jyldamdyq rejımin asyryp, kólikti basqara almaı, jaıaý júrginshiler jolyna shyǵyp ketken.

«Jol apaty saldarynan áıel oqıǵa ornynda kóz jumdy, al ekinshi adam, sondaı-aq avtokólik júrgizýshisi men onyń jolaýshysy túrli jaraqattarymen oblystyq klınıkalyq aýrýhanaǵa jetkizildi», - dep málimdedi Qaraǵandy oblysy Polıtsııa departamenti tergeý basqarmasynyń bastyǵy Azamat Ahmetov.

Atalǵan fakti boıynsha qylmystyq is qozǵalyp, tergeý amaldary júrip jatyr.

Qaraǵandy oblysy Polıtsııa departamenti júrgizýshilerdi jyldamdyq rejımin jáne jol qozǵalysy erejelerin saqtaýǵa shaqyrady.

Osyǵan deıin Atyraý oblysynda jol apatynan 3 adam mert bolǵany týraly jazdyq.