Qaraǵandyda tirkelmegen lıtsenzııamen ańshylyq jasaǵandar anyqtaldy

ASTANA. KAZINFORM — Qaraǵandyda polıtseıler men tabıǵat qorǵaýshylary zańsyz ańshylyqpen aınalysqan kúdiktini ustady, dep habarlaıdy Іshki ister mınıstrliginiń baspasóz qyzmeti.

Qaraǵandy oblysynda tabıǵatty qorǵaý polıtsııasy men «Karohotrybprom» JShS egerleriniń birlesken túngi reıdi barysynda zańsyz ańshylyq deregi anyqtaldy. Túngi saǵat 2 shamasynda júrgizilgen shara kezinde kıik atqan eki azamat ustaldy.

Vedomstvo atap ótkendeı, tekserý barysynda olardyń Qaraǵandy qalasynyń 48 jáne 40 jastaǵy turǵyndary ekeni anyqtaldy. Belgili bolǵandaı, er adamdar bir ǵana ańshylyq lıtsenzııasyn rásimdegenimen, ony egerlerge tirketpeı, zańda belgilengen tártipti buzǵan. Bul — ańshylyq erejeleriniń buzylǵanyn rastaıdy, sebebi lıtsenzııany tirkeý ań aýlaý kvotalarynyń saqtalýyn baqylaýǵa jáne janýarlardy zańsyz atýǵa jol bermeýge baǵyttalǵan.

— Oqıǵa ornyn qaraý barysynda eki kıiktiń óleksesi, bir uńǵyly myltyq jáne birneshe patron aıǵaq zat retinde tárkilendi. Atalǵan derek boıynsha Qazaqstan Respýblıkasynyń Qylmystyq kodeksine sáıkes qylmystyq is qozǵaldy. Tergeý amaldary júrgizilip jatyr, — delingen ІІM taratqan aqparatta.

Budan buryn balyq aýlaý men ańshylyq kezinde 10 aqmolalyq sý aıdyndarynda qaza tapqanyn jazǵanbyz.