Qaraǵandyda toı korteji shý shyǵardy: qaýipti manevr jasap, avtoturaqta otshashý atqandar jaýapqa tartyldy
ASTANA. KAZINFORM — Qaraǵandyda qaýipti manevr jasap, avtoturaqta otshashý atqan toı kortejiniń qatysýshylary polıtsııa tarapynan anyqtalyp, jol erejesi men qoǵamdyq tártipti buzǵany úshin jaýapqa tartyldy. Bul týraly Polisia.kz jazdy.
Áleýmettik jelilerde Qaraǵandyda úılený toıy kortejine qatysýshylardyń quqyq buzýshylyqtary túsirilgen beınejazbalar tarady. Kadrlarda avtokólik júrgizýshileri qaýipti manevrler jasap, saýda ortalyǵynyń avtoturaǵynda otshashý atqan.
Polıtsııa qyzmetkerleri barlyq quqyq buzýshyny anyqtap, olardy jol erejesin jáne azamattardyń tynyshtyǵyn buzǵany úshin jaýapkershilikke tartty.
—️ Polıtsııa jol júrisine qatysýshylardyń barlyǵy jol júrisi qaǵıdalary men qoǵamdyq tártipti saqtaýǵa mindetti ekenin eske salady. Qaýipti manevrler jasaý jáne azamattardyń tynyshtyǵyn buzatyn áreketter zańda kózdelgen jaýapkershilikke ákep soǵady, — dep eskertti polıtsııadan.
Buǵan deıin Túrkistanda júrgizýshi kýáliginsiz kólik tizgindep, qaýipti manevr jasaǵandar jazalanǵan edi.
