Qaraǵandyda tótenshe jaǵdaı rejımi jarııalandy
Ótken demalys kúnderi Qaraǵandy oblysynda daýyl soǵyp, júzden asa ǵımaratqa zaqym keldi. Osy oraıda oblys ákimi Qaraǵandyda tótenshe jaǵdaı rejımin engizýdi tapsyrdy. Qutqarýshylar aýa raıynyń saldaryn joıyp jatyr. Qurbandar men zardap shekkender joq, dep habarlaıdy Kazinform.
Óńirdegi jaǵdaı týraly oblys ákimi Ermaǵanbet Bólekpaevqa TJ departamentiniń bastyǵy Murat Qatpanov baıandady.
«18-19 qarashada aımaqta qatty jeldiń saldarynan 114 turǵyn úı men ártúrli ǵımarattardyń shatyryna, qabyrǵasyna zaqym keldi. Qıraǵan shatyrdyń jalpy aýdany — 18 947 sharshy metr. Qaraǵandy, Temirtaý, Balqash, Shahtınsk, Aqtoǵaı, Abaı, Buqar jyraý, Osakarov, Nura, Qarqaraly jáne Shet aýdandarynyń aýmaǵynda elektr energııasy ishinara óship qaldy. Qazirgi ýaqytta oblystyń eldi mekenderiniń basym bóligi elektr energııasyna qosylǵan, úsh qalada jáne tórt aýdanda avarııalyq jumystar jalǵasyp jatyr. Sondaı-aq, aǵashtardyń qıraýy men qulaý qaýpi týraly 85 habar tústi», — dedi Murat Qatpanov.
Ermaǵanbet Bólekpaev qalalar men aýdandardyń ákimine qysqa merzimde zardap shekken nysandardy qalpyna keltirýdi tapsyrdy.
TJ jarııalap, barlyǵyn zań aıasynda jasaý kerektigin tilge tıek etti.
Zaqym kelgen úı turǵyndary shatyr men qaptamny jóndeýge qatysty alańdaýshylyq bildirip jatyr. Qaraǵandylyqtardyń bul suraǵyna qala ákimdigi jaýap berdi.
«Tótenshe jańdaı sheńberinde qalalyq ákimdik ushyp ketken shatyrlardy qaıta qalpyna keltirip beredi» dedi ákimdikten.
Eske sala keteıik, senbi 18 qarashada Qaraǵandy oblysynda qatty jel saldarynan birneshe ǵımaratqa zaqym kelgen bolatyn.
