Qaraǵandyda tórt temirjolshynyń qaza tabýyna baılanysty úsh adam qamaýǵa alyndy
QARAǴANDY. KAZINFORM — Qaraǵandy oblysynda júk poıyzy jol brıgadasyn qaǵyp ketip, tórt temirjolshynyń qaza tabýyna qatysty qylmystyq is boıynsha úsh kúdikti ustalyp, ýaqytsha ustaý ızolıatoryna qamaldy.
Kóliktegi polıtsııa departamentiniń málimetinshe, qaıǵyly oqıǵa 2025 jylǵy 10 jeltoqsanda «Sheshenqara — Qarajańǵyl» temirjol aralyǵynda bolǵan.
Sol kúni Saryshaǵan stantsııasynyń qyzmetkerleri josparly túrde rels aýystyrý jumystaryn júrgizip jatqan. Osy sátte júk poıyzy jol brıgadasyn basyp ketken.
Oqıǵa saldarynan tórt temirjol qyzmetkeri oqıǵa ornynda kóz jumdy.
Atalǵan derek boıynsha Shý stantsııasyndaǵy jelilik polıtsııa bólimi temirjol kóligi qozǵalysy nemese ony paıdalaný qaýipsizdigi qaǵıdalaryn buzý, abaısyzda eki nemese odan da kóp adamnyń ólimine ákep soǵý faktisi boıynsha sotqa deıingi tergep-tekserý bastaǵan edi.
Júrgizilgen jedel-tergeý sharalarynyń nátıjesinde quqyq qorǵaý organdary úsh kúdiktini anyqtap, ustady. Sot sanktsııasymen olarǵa qatysty bultartpaý sharasy retinde qamaýda ustaý túri tańdalǵan.
Polıtsııa ókilderi tergeý jalǵasyp jatqanyn málimdedi. Qazaqstan Respýblıkasynyń Qylmystyq-protsestik kodeksiniń 201-babyna sáıkes, istiń ózge mán-jaılary tergeý múddesine baılanysty jarııa etilmeıdi.
Budan buryn Qaraǵandy oblysynda hokkeıshi muz aıdynynda qaıtys bolǵanyn jazǵanbyz.