Qaraǵandyda topyraq astynda qalyp qoıǵan jumysshynyń jaǵdaıy qalaı
QARAǴANDY. KAZINFORM - Qaraǵandyda jer qazý jumystary kezinde oqys oqıǵa oryn aldy. Qutqarýshylar sý men topyraqqa tolǵan ordan jumysshyny alyp shyqty.
Oqıǵa Qaraǵandy qalasynyń Qazybek bı atyndaǵy aýdanyndaǵy Molokov kóshesinde káriz júıesin tartý jumystary kezinde bolǵan. Jumys barysynda 23 jastaǵy jumysshy topyraq astynda qalyp qoıǵan.
Oqıǵa ornyna Qaraǵandy oblysy TJD jedel-qutqarý jasaǵynyń qyzmetkerleri keldi. Olar jumysshylarmen birlesip, qutqarý jumystaryn júrgizip, er adamdy sý men topyraqqa tolǵan ordan alyp shyqty.
— Jer qazý jumystary kezinde zardap shekken adam topyraq astynda qalyp qoıǵan. Jedel-qutqarý jasaǵynyń qyzmetkerleri jumysshylarmen birge er adamdy ordan alyp shyqty. Qutqarý jumystary aıaqtalǵannan keıin ol jedel medıtsınalyq járdem brıgadasyna tapsyryldy, - dep habarlady Qaraǵandy oblysynyń TJD.
Qaraǵandy oblysynyń densaýlyq saqtaý basqarmasynyń málimetinshe, er adamnyń jaǵdaıy turaqty. Ony jedel medıtsınalyq járdem qyzmetkerleri qarap teksergen. Alaıda ol statsıonarlyq em alýdan bas tartqan.
Qazir oqıǵanyń mán-jaıy anyqtalyp jatyr.
Buǵan deıin qutqarýshylar topyraq astynda qalǵan er adamdy alyp shyqqany habarlanǵan bolatyn.
