Qaraǵandyda Topar MAES-ine 8 mln teńgeden astam aıyppul salyndy
QARAǴANDY. KAZINFORM — Tekserý barysynda aǵyn sýlarmen jáne óndiristik qaldyqtarmen jumys isteý kezinde birqatar zań buzýshylyq anyqtaldy. Kásiporynǵa anyqtalǵan kemshilikterdi joıý týraly nusqamalar berilip, salynǵan aıyppuldardyń jalpy somasy 8 mln teńgeden asty.
Qaraǵandy oblysy boıynsha ekologııa departamenti «Topar MAES» JShS-ne josparly tekserý júrgizdi.
Tekserý barysynda aǵyn sýlar quramyndaǵy munaı ónimderiniń mólsheri boıynsha belgilengen normatıvtiń asyp ketkeni anyqtaldy. Ruqsat etilgen kórsetkish 0,054 mg/dm³ bolsa, naqty kórsetkish 0,169 mg/dm³ bolǵan.
Sondaı-aq mamandar qaldyqtardy jınaqtaý jáne saqtaý kezinde birqatar zań buzýshylyqty anyqtady. Atap aıtqanda, paıdalanylǵan maılarǵa arnalǵan germetıkalanbaǵan ydystar, maıly suıyqtyqtardyń tógilýi, ártúrli qaldyq túrleriniń birge jınaqtalýy jáne qaldyqtardyń bul maqsatqa arnalmaǵan oryndarǵa ornalastyrylýy sekildi ereje buzý faktileri tirkeldi.
Tekserý qorytyndysy boıynsha kásiporynǵa anyqtalǵan zań buzýshylyqtardy joıý týraly nusqamalar berildi.
Jalpy somasy 8 021 492 teńge kóleminde aıyppul salyndy.
Buǵan deıin Balqash mys qorytý zaýytyna 6,3 mln teńge aıyppul salynǵany habarlanǵan bolatyn.
