Qaraǵandyda taksı júrgizýshisi «qaljyńdap» 4 jasar balany alyp ketken

QARAǴANDY. KAZINFORM — Qaraǵandyda taksı júrgizýshisi tórt jasar balany alyp ketip, bir saǵattan soń anasyna qaıtarǵan. Áıel tártip saqshylarynan oqıǵany «qaljyń» dep qarastyrmaı, júrgizýshini jazalaýdy talap etip otyr.

Áıeldiń áleýmettik jelide jazǵan jazbasy qoǵamda úlken rezonans týdyrdy. 

Onyń aıtýynsha, oqıǵa 4 qarasha kúni saǵat 16:40 shamasynda bolǵan. Ol Indriver qosymshasy arqyly taksı shaqyrǵan. Qolynda bir jasar sábıi bolǵan, al tórt jarym jastaǵy qyzyn artqy oryndyqqa otyrǵyzyp jatqan sátte kólik júrip ketken.

— Qyzymdy otyrǵyza sala kólik ornynan qozǵalyp ketti. Men artynan júgirip, toqtatýǵa tyrystym, biraq úlgermedim. Telefon soǵyp, birneshe ret qońyraý shaldym — kótermedi. Keıin tapsyrysty jaýyp, kartadan múlde joǵalyp ketti, — dep eske alady áıel.

Aıtýynsha, qyzy beıtanys er adamnyń kóliginde shamamen bir saǵattaı ýaqyt bolǵan. Kólik Gogol kóshesindegi aınalma joldyń boıynan tabylǵan. Áıel polıtsııaǵa aryz jazǵan, alaıda tártip saqshylary «qylmys quramy joq, bul jaı qaljyń» dep jaýap bergen.

Qaraǵandy oblystyq polıtsııa departamenti bul jaıtqa qatysty resmı túsinikteme berdi.

— 4 qarasha kúni saǵat 16:48–de Jedel basqarý ortalyǵyna qala turǵynynan habarlama tústi. Áıeldiń aıtýynsha, ol qyzyn kólikke otyrǵyzyp, ózi ekinshi esikten minbek bolǵan sátte júrgizýshi qozǵalyp ketken. Kólik ıesi anyqtalyp, ol taksı júrgizýshisimen baılanysqa shyqqan. Taksıst birshama qashyqtyq júrip ótken soń artqy oryndyqta eresek adamsyz otyrǵan balany baıqap, dereý keri oralyp, qyzdy anasymen qaýyshtyrǵan, — delingen departamenttiń baspasóz habarlamasynda.

Polıtsııa málimetinshe, júrgizýshige qatysty jolaýshylardy tasymaldaý erejelerin buzý jáne zańsyz kásipkerlikpen aınalysý faktileri boıynsha ákimshilik is qozǵalǵan.

Alaıda áleýmettik jeli qoldanýshylary bul jaǵdaıdy «ázil» dep qaraýǵa bolmaıdy dep sanaıdy. Sebebi másele — balanyń ómiri men qaýipsizdigine, sondaı-aq ata-ananyń senimine qatysty.

Eske salsaq, endi taksı qyzmetin shaqyratyn qosymsha arqyly jumys istegisi keletinder ákimdikke «taksıst» ekenin habarlaýy tıis. Sondaı-aq jolaýshy tasıtyn júrgizýshige rólde 9 saǵattan artyq otyrýǵa tyıym salynady.