Qaraǵandyda sıntetıkalyq esirtki óndirýmen aınalysqan qylmystyq top ustaldy

ASTANA. KAZINFORM – Qaraǵandy oblysynda polıtsııa esirtki óndirýmen aınalysqan uıymdasqan toptyń zańsyz áreketin toqtatty, dep habarlaıdy Polisia.kz.

Qaraǵandy oblysynyń polıtsııa departamenti «Zań men tártip» qaǵıdaty aıasynda óńirde esirtkiniń zańsyz aınalymyna qarsy kúres jumystaryn jalǵastyryp keledi.

5 qarasha kúni esirtki qylmysyna qarsy is-qımyl basqarmasynyń qyzmetkerleri oblystyq prokýratýramen birlesip, Qaraǵandy qalasynyń Sortırovka kentinde keń aýqymdy arnaıy operatsııa júrgizdi.

Nátıjesinde jasy 28 ben 30 arasyndaǵy eki oblys turǵyny sıntetıkalyq esirtki óndirýge arnalǵan jasyryn zerthana uıymdastyrdy degen kúdikpen ustaldy.

Tintý kezinde tártip saqshylary jaldamaly úıden bir tonnadan astam prekýrsor jáne 52 keliden astam daıyn esirtki zaty — “Alfa-PVP” tárkiledi. Sonymen qatar esirtki óndirýge arnalǵan elektrondy tarazylar, aralastyrǵyshtar, keptirgishter, vakýýmdaǵyshtar, konteınerler jáne ózge de tehnıkalyq qurylǵylar aıǵaq zat retinde alyndy.

— Operatsııa nátıjesinde shamamen 173 myń doza sıntetıkalyq esirtkiniń qara naryqqa túsýiniń joly kesildi. Sondaı-aq azamattar arasynan jańa «kýrerler» men jasyryn taratýshylardyń qylmystyq iske tartylýyna jol berilmedi, — dedi Qaraǵandy oblystyq polıtsııa departamenti esirtki qylmysyna qarsy is-qımyl basqarmasynyń bastyǵy Ǵalymjan Bekbolatov.

Aldyn ala tergeý derekteri boıynsha, kúdiktiler úıdi zerthana retinde jaldap, psıhotroptyq zattardy sheteldik kýratordyń nusqaýymen daıyndaǵan. Al eńbekaqysy krıptovalıýta túrinde tólenip otyrǵan.

Qazir bul derek boıynsha qylmystyq is qozǵalyp, eki kúdikti ýaqytsha ustaý ızolıatoryna qamaldy. Sotqa deıingi tergeý amaldary júrgizilip jatyr.

Aıta keteıik, esirtki qylmysyna tartylǵan 60-tan astam jasóspirim ustaldy.