Qaraǵandyda sheteldik stýdent jataqhanada kóz jumdy
ASTANA. KAZINFORM – Qaraǵandyda medıtsınalyq ýnıversıtettiń sheteldik stýdenti jazataıym oqıǵadan qaza tapty.
Qaıǵyly jaǵdaı 17 naýryz kúni qaladaǵy jataqhanalardyń birinde bolǵan. Qaza tapqan 21 jastaǵy jigit medıtsınalyq ýnıversıtettiń halyqaralyq fakýltetinde sońǵy kýrsta oqyp júrgen.
Aldyn ala málimet boıynsha, ol Úndistan azamaty bolǵan. Oqıǵadan keıin stýdenttiń denesi týǵan eline jiberilgen.
Belgili bolǵandaı, stýdent jataqhananyń besinshi qabatynda turǵan. Qolda bar aqparatqa sáıkes, sol jerden qulap ketken.
Qaraǵandy oblystyq polıtsııa departamentiniń baspasóz qyzmeti atalǵan derek boıynsha sotqa deıingi tergeý bastalǵanyn habarlady.
– 17 naýryz kúni Qaraǵandydaǵy joǵary oqý oryndarynyń biriniń 21 jastaǵy stýdentiniń besinshi qabattan qulap, kóz jumý deregi boıynsha sotqa deıingi tergeý bastaldy. Tergeý aıasynda barlyq qajetti tergeý áreketteri júrgizildi, – dep málimdedi vedomstvo.
Joǵary oqý orny da oqıǵany rastady.
– 17 naýryz kúni jataqhanada stýdenttiń bıikten qulaý faktisi boldy. Sonyń saldarynan stýdent qaıtys boldy. Qazirgi tańda oqý ornyndaǵy moraldyq-psıhologııalyq ahýal turaqty, – dep habarlady ýnıversıtet ókilderi.
Resmı málimetke sáıkes, tergeý aıaqtalyp, qylmystyq is zańnamaǵa sáıkes toqtatylǵan.
Aıta keteıik, buǵan deıin Qyzylordada jataqhanada qaza tapqan 16 jastaǵy stýdenttiń ólimine qatysty tergeý bastalǵany habarlanǵan bolatyn.
