Qaraǵandyda Shahterler kúnine arnalǵan kontsertte 235 bala ata-anasynan adasqan

ASTANA. KAZINFORM — Qaraǵandyda Shahterler kúni qaýipsiz ótti. Polıtsııa qyzmetkerleri ata-anasynan adasyp qalǵan 235 balany otbasymen qaýyshtyrdy, dep habarlaıdy Polisia.kz.

Keshe Qaraǵandyda Shahterler kúni merekesi keń aýqymda atalyp ótti. Ortalyq alańǵa 120 myńǵa jýyq qala turǵyny men qonaqtary jınalyp, merekelik kontsertke kýá boldy.

— Sharanyń qaýipsizdigin qamtamasyz etý maqsatynda 1000-nan astam polıtsııa qyzmetkeri jáne Ulttyq ulannyń 300 áskerı qyzmetshisi jumyldyryldy. Merekede birde-bir quqyq buzýshylyq tirkelgen joq. Degenmen, halyq kóp shoǵyrlanǵan orynda balalardyń adasyp qalý jaǵdaılary tirkeldi. Barlyǵy 235 bala ýaqytsha ata-anasynan ajyrap qalǵan. Polıtsııa qyzmetkerleriniń jedel ári úılesimdi áreketiniń arqasynda olardyń barlyǵy qysqa ýaqyt ishinde tabylyp, ata-anasyna aman-esen tabystaldy, — delingen habarlamada.

Osy maqsatta tártip saqshylary kontserttiń júrgizýshilerimen turaqty baılanys ornatyp, tabylǵan balalar jaıly jedel habar taratyp otyrdy. Sondaı-aq balalardyń qaýipsizdigi úshin arnaıy avtobýs bólinip, onda búldirshinder ata-anasy kelgenge deıin baqylaýda boldy. Bul oqıǵa polıtsııa qyzmetiniń basty qaǵıdaty — azamattardyń qaýipsizdigin qorǵaý men járdemdesýge árqashan daıyn ekendiginiń aıqyn kórinisi boldy.

Osydan buryn Prezıdent atynan shahterlerge joǵary memlekettik nagradalar tapsyrylǵanyn jazǵan edik.