Qaraǵandyda iri kólemdegi kontrafaktilik taýarlar tárkilendi
ASTANA. KAZINFORM – Qaraǵandyda LEGO kompanııasynyń taýar belgilerin zańsyz paıdalana otyryp jasalǵan kontrafaktilik ónimderdiń iri kólemde taralýyna jol berilmedi, dep habarlaıdy Polisia.kz.
Qaraǵandy oblystyq kıberqylmysqa qarsy is-qımyl basqarmasy men Ádilet departamenti birlesip júrgizgen «Kontrafakt» jedel-profılaktıkalyq is-sharasy aıasynda zańsyz ónimdi anyqtaý boıynsha keshendi reıdter ótkizildi.
Tekserý LEGO kompanııasynyń resmı ótinishine sáıkes júrgizildi. Kompanııa ókilderi Qazaqstan naryǵynda jalǵan ónimderdiń taralýyna alańdaýshylyq bildirgen.
Qaladaǵy birneshe dúken men qoımaǵa jasalǵan tekseris barysynda jalpy quny shamamen 1 mıllıon teńgeni quraıtyn 175-ten astam kontrafaktilik LEGO konstrýktory tárkilendi.
Saraptama nátıjesi tárkilengen taýarlardyń túpnusqa LEGO ónimderine uqsamaıtynyn, sapasynyń tómen ekenin jáne óndirýshi týraly málimettiń joq ekenin anyqtady.
Atalǵan derek boıynsha QR Ákimshilik quqyq buzýshylyq týraly kodeksiniń 158-baby boıynsha ákimshilik is qozǵaldy.
Zııatkerlik menshik quqyqtaryn qorǵaý jáne kontrafaktilik ónimdermen kúres jumystary jalǵasady.
Aıta keteıik, kontrabandalyq jolmen taýar tasyp, memleketke 10 mlrd teńge zalal keltirgender ustaldy.