Qaraǵandyda iri esirtki zerthanasy joıyldy

QARAǴANDY. KAZINFORM – Qaraǵandy oblysy polıtsııa departamentiniń qyzmetkerleri Qaraǵandy qalasyndaǵy aýdandardyń birinde jumys istegen esirtki zerthanasyn joıý boıynsha arnaıy operatsııa júrgizdi, – dep jazdy Polisia.kz.

Іs-shara barysynda saıajaı aýmaǵynda aq tústi untaq tárizdes zat toltyrylǵan 6 aǵash bóshke tabyldy. Bul zat esirtki jasaýǵa arnalǵan prekýrsor ekeni anyqtaldy. Keıinirek bul bóshkeler BMW X5 kóligine tıelgeni anyqtaldy. Kólikti 39 jastaǵy Qaraǵandy qalasynyń turǵyny basqarǵan. Júk jeke úıge tasymaldanbaq bolǵan kezde kólik toqtatyldy. Úıge tintý júrgizý barysynda 1 tonnadan astam prekýrsor jáne 10 keliden astam daıyn esirtki — alfa-PVP tárkilendi.

Sonymen qatar prekýrsorlary bar 6 aǵash bóshke, suıyqtyǵy bar 35 shyny pallet, olardyń quramynda keptirý satysyndaǵy psıhotroptyq zat bolýy múmkin degen kúdik bar, belgisiz suıyqtyq quıylǵan 33 kanıstr, untaq tárizdes zat salynǵan 4 qap, súzgileri bar 5 gaztutqysh, jalpy salmaǵy shamamen 3 keli bolatyn alfa-PVP daıyn esirtkisi salynǵan 3 vakýýmdy paket, esirtki jasaýǵa arnalǵan jabdyq (aralastyrǵyshtar, vakýýmator, jeldetkish júıesiniń metall bólshekteri), tarazylar, telefondar, júıelik blok jáne zańsyz áreketke qoldanylǵan basqa da zattar bar.

Bul operatsııanyń nátıjesinde qara naryqqa 500 myń dozaǵa jýyq sıntetıkalyq esirtkiniń shyǵýyna tosqaýyl qoıyldy. Sonymen qatar jańa qatysýshylardy, onyń ishinde azamattyq turǵyndar arasynan kýrerlerdi (jasyryn qoıyp ketýshilerdi) qylmystyq áreketke tartýdyń aldyn alý múmkin boldy. Qylmystyq is boıynsha kúdikti ýaqytsha ustaý ızolıatoryna qamaldy.

Tárkilengen zattarǵa saraptama taǵaıyndalyp, tergeý amaldary jalǵasyp jatyr.

Jezqazǵanda esirtki jarnamalaıtyn 200 Telegram-kanal buǵattalǵanyn jazǵan bolatynbyz.