Qaraǵandyda polıtsııamen bir sapta qyzmet etken bala jurtty súısindirdi

ASTANA. KAZINFORM — Qaraǵandy oblysynda jol qozǵalysy qaýipsizdigin túsindirý jumystaryna 8 jastaǵy Nurasyl Tólegenov qatysty, dep habarlaıdy QR ІІM baspasóz qyzmeti.

Qaraǵandy oblysynda eń jas polıtseı joldaǵy qaýipsizdikke úles qosyp jatyr. Jol erejelerin jetik meńgergen balaqaı áleýmettik jeli qoldanýshylary arasynda keńinen tanymal. Ol Qaraǵandy — Almaty baǵytyndaǵy respýblıkalyq mańyzy bar tasjolda polıtsııa qyzmetkerlerimen birge júrgizýshilerge túsindirý jumystaryn júrgizdi. 

Nurasyl leıtenant shenin taǵyp, arnaıy nysandyq kıim kıip, tártip saqshylarymen ıyq tirese qyzmet etti. Ol júrgizýshilerge jol-kólik oqıǵalarynyń aldyn alý úshin basty erejelerdi túsindirip, jyldamdyqty asyrmaý, qarsy baǵytqa shyqpaý jáne jolda demalysty eskerýsiz qaldyrmaý qajettigin eskertti.

Polıtsııa bolýdy armandaıtyn Nurasyldyń bul qyzyǵýshylyǵy beker emes — onyń ákesi de patrýldik polıtsııa batalonynyń qatarynda qyzmet atqarady.

— Qazirgi tańda jol qozǵalysy qaýipsizdigi — kún tártibindegi eń ózekti máselelerdiń biri. Jaz mezgilinde Qaraǵandy — Balqash baǵyty boıynsha kólik aǵyny kúrt artady. Osyǵan baılanysty atalǵan jolda polıtsııa narıadtarynyń sanyn arttyrdyq. Buryn bul baǵytta 17 avtopatrýl jumys istese, qazir olardyń sany 30-ǵa jetkizildi. Ár patrýl beketiniń araqashyqtyǵy shamamen 10 shaqyrym. Qoǵamdyq qaýipsizdikke ún qosqan eń jas polıtseıdiń bastamasy — barshaǵa úlgi. Bul shara turǵyndar arasynda quqyqtyq mádenıetti arttyrýǵa baǵyttalǵan is-sharalardyń bir bóligi retinde uıymdastyryldy, — dedi patrýldik polıtsııa batalonynyń komandıri Medet Nurmuhanov. 

Aıta keteıik, 2025 jyldyń basynan beri Qaraǵandy oblysynda 34 jol-kólik oqıǵasy tirkelip, onyń saldarynan 16 adam kóz jumyp, 51 azamat túrli dene jaraqatyn alǵan. Sonymen qatar respýblıkalyq mańyzy bar tasjoldarda 25 júrgizýshi mas kúıinde kólik tizgindegeni úshin ustalǵan.

Buǵan deıin Qaraǵandyda kólik kıikterdi qaǵyp ketip, jolaýshy zardap shekkenin jazǵanbyz.