Qaraǵandyda polıtsııa qyzmetkeri qaza boldy
QARAǴANDY. KAZINFORM — Qaraǵandyda oqý-jattyǵý barysynda polıtsııa maıory qaza boldy. Tártip saqshysy jazataıym oq tıip, kóz jumǵan.
Qaıǵyly jaıt 14 naýryz kúni Qaraǵandydaǵy oqý-jattyǵy alańynda bolǵan. Ázirge oqıǵanyń mán-jaıy týraly aqparat joq. Alaıda Іshki ister mınıstri Erjan Sádenov óziniń resmı paraqshasynda marqumnyń týǵandaryna kóńil aıtyp, habarlama jarııalady.
— Oqý-jattyǵý is-sharalaryn ótkizý kezinde bolǵan jazataıym oqıǵa saldarynan qaza tapqan Qaraǵandy oblysy Polıtsııa departamentiniń qyzmetkeri Aldan Álıevtiń týystary men jaqyndaryna kóńil aıtamyn, — dep jazdy elimizdiń bas polıtseıi.
Qaraǵandy oblysy Polıtsııa departamenti de qaza bolǵan áriptesiniń týǵandaryna kóńil aıtyp, polıtsııa maıory Aldan Álıev jazataıym oqıǵa saldarynan kóz jumǵanyn habarlady.
— Qaraǵandy oblystyq Polıtsııa departamentiniń basshylyǵy, ardagerler keńesi jáne jeke quramy, oqý-jattyǵý is-sharalaryn ótkizý kezinde bolǵan jazataıym oqıǵa saldarynan qaza tapqan, Polıtsııa departamenti Oqý-jattyǵý vzvodynyń aǵa ınspektory polıtsııa maıory Álıev Aldan Jumajanulynyń jaqyndary men týystarynyń qaıǵysyna ortaqtasyp, kóńil aıtady, — dep jazylǵan habarlamada.
QR Іshki ister mınıstri sondaı-aq Aldan Álıevtiń týǵandaryna kómek kórsetilip, tergeýdi jeke baqylaýyna alatynyn aıtty.
— ІІM marqumnyń otbasyna barlyq qajetti qoldaýdy kórsetedi. Oqıǵa ornyna meniń orynbasarymnyń basshylyǵymen komıssııa jiberildi. Tergeý barysy baqylaýda, — dep qosty Erjan Sádenov.
Osyǵan deıin Túrkistan oblysynda polıtsııa ınspektory qaza bolǵany jaıly habarlaǵan bolatynbyz.