Qaraǵandyda polıtseıler er adamdy qutqaryp qaldy

ASTANA. KAZINFORM – Qaraǵandyda polıtseıler 9-qabattaǵy balkonnan sekirmek bolǵan er adamdy aman alyp qaldy. Oqıǵa 5 maýsym kúni Táttimbet kóshesinde bolǵan. 

 Polıtsııa men tótenshe jaǵdaılar qyzmetiniń jedel ári úılesimdi is-qımylynyń arqasynda 39 jastaǵy azamat qutqaryldy.

Kópqabatty úıdiń toǵyzynshy qabatyndaǵy balkonnyń syrtynda arqanǵa ilinip turǵan er adamdy kórgen kýágerler birden qutqarý qyzmetterine habar bergen.

Polıtsııa qyzmetkerleri men qutqarýshylar oqıǵa ornyna jyldam jetip, shuǵyl áreketke kóshken.

Qaraǵandy qalasy Ońtústik-Shyǵys polıtsııa bólimi krımınaldyq polıtsııa bólimshesi bastyǵynyń orynbasary Ádilet Ámirbekov er adamdy áńgimege tartyp, ony raıynan qaıtarýǵa tyrysqan.

— Qutqarýshylar esikti ashýǵa árekettenip jatqanda, men balkon syrtynda turǵan er adammen sóılesýge tyrystym. Ýaqyt sanaýly edi. Áriptesterim tómengi qabatta saqtyq sharalaryn baqylap turdy. Aqyry bir sátte ony ishke qaraı tartyp úlgerdik, — deıdi ol.

Qutqarý operatsııasy birneshe mınýtqa ǵana sozylǵanymen, ár sekýnd qymbat edi. Polıtseılerdiń kásibı sheberligi men batyldyǵy úlken qaıǵyly jaǵdaıdyń aldyn aldy. Qazirgi tańda qutqarylǵan azamat medıtsınalyq baqylaýda. Dárigerler men psıhologtar onyń mundaı áreketke ne úshin barǵanyn anyqtap, tıisti kómek kórsetýde.

Aıta ketelik polıtsııa Qarmet kásipornyndaǵy 1 mlrd teńgeniń urlyǵyn áshkerelegen edi.