Qaraǵandyda polıtseıler avtokólik urlyǵyn «izin sýytpaı» ashty

ASTANA. KAZINFORM – Qaraǵandy qalasynda patrýldik polıtsııa polki qyzmetkerleri avtokólik urlyǵyna kúdiktini jedel ustap, quqyq buzýshylyqtyń aldyn aldy, dep habarlaıdy Polisia.kz.

15 tamyz kúni tańerteń «102» arnasyna N. Ábdirov kóshesindegi úı aýlasynan Toyota Carina avtokóliginiń urlanǵany týraly habar túsken. Aqparat dereý qaladaǵy barlyq patrýldik ekıpajdarǵa jetkizildi.

Kóp uzamaı izdestirilip jatqan kólik Erýbaev kóshesindegi janarmaı quıý beketinen baıqaldy.

Polıtseılerdi kórgen júrgizýshi qashpaq bolǵan. Osy mańdaǵy qosymsha narıadtar jumyldyrylyp, úılesimdi is-qımyldyń arqasynda kólik toqtatylyp, kúdikti ustaldy.

Kólikti 26 jastaǵy qala turǵyny basqarǵany anyqtaldy. Atalǵan derek boıynsha QR QK-niń 200-baby (Kólik quralyn urlaý) boıynsha qylmystyq is qozǵaldy.

Tergeý amaldary júrgizilýde.

Polıtsııa turǵyndarǵa zańdy saqtaý qajettigin eskertip, quqyqtyq tártipti qamtamasyz etý jumystary táýlik boıy júrgiziletinin atap ótti.

Aıta keteıik, Almatyda iri kólemdegi páter urlyǵy ashyldy.