Qaraǵandyda páterden órt shyǵyp, er adam qaza boldy

QARAǴANDY. KAZINFORM — Qaraǵandyda bes qabatty turǵyn úıden órt shyqty. Ot sharpyǵan páterden er adamnyń máıiti tabyldy, dep habarlaıdy Kazinform tilshisi.

Búgin saǵat 17:48-de TJD kezekshisiniń pýltine 5 qabatty turǵyn úıdegi páterdiń órtengeni týraly habarlama kelip túsken. Qutqarýshylar brıgadasy órt ornyna kelip, bes azamatty, onyń ishinde eki balany qutqardy. Sondaı-aq, órt sóndirýshiler taǵy bes adamdy evakýatsııalady.

“Jergilikti jerde otty joıýǵa jeke quramnyń 30 adamy jáne 7 birlik tehnıka jumyldyryldy. Órt saǵat 18:19-da joıyldy. Órttiń shyǵýyna aldyn-ala boljamǵa saı elektr symdarynyń qysqa tuıyqtalýy sebep bolǵan. Órt ornynda 1953 jyly týǵan er adamnyń denesi tabyldy”, - dep habarlady Qaraǵandy oblysy TJD baspasóz qyzmeti.