Qaraǵandyda páter tonaýmen aınalysqan qylmystyq top ustaldy

QARAǴANDY. KAZINFORM –  Qaraǵandyda páter tonaýmen aınalysqan qylmystyq top ustaldy.

 Polisia.kz-tiń málimetinshe júrgizilgen keshendi jedel-izdestirý is-sharalarynyń nátıjesinde Qaraǵandy qalalyq polıtsııa basqarmasyna qarasty Ortalyq polıtsııa bóliminiń qyzmetkerleri «Arlan» arnaıy maqsattaǵy bólimshesiniń qyzmetkerlerimen birlesip, birneshe páter urlyǵymen aınalysqan urylar tobyn anyqtap, ustady.

Arnaıy operatsııa barysynda 23 pen 36 jas aralyǵyndaǵy bes adam ustaldy. Tergeý málimetterine sáıkes, kúdiktiler ótken jyldyń qarasha-jeltoqsan aılarynda páterlerge tereze torlaryn buzyp, plastıkalyq terezelerdi buzyp kirip, baǵaly zattar men aqsha urlaǵan. 

Oqıǵalardyń biri 11 qarashada bolǵan. Polıtsııaǵa qala turǵyny belgisiz bireýler Jambyl kóshesindegi úıindegi páterine kirip, jatyn bólmedegi shkaftan 11 altyn buıymdy urlap ketkenin aıtyp, aryzdanǵan. Keltirilgen shyǵyn kólemi - 1 500 000 teńge.

Osyǵan uqsas qylmys Qaraǵandy qalasynyń 60 jastaǵy turǵynynyń Abaı kóshesindegi páterinde de tirkeldi. Qaskóıler zergerlik buıymdar men 7 000 000 teńge kólemindegi (5 000 AQSh dollary jáne 3 000 000 teńge) aqshany qoldy qylǵan.

Tergeý barysynda kúdiktilerdiń Qaraǵandy men Temirtaýdaǵy jeti páter urlyǵyna qatysy bar ekeni dáleldendi. Keltirilgen jalpy shyǵyn shamamen 15 000 000 teńge. Úsh kúdikti qamaýǵa alyndy. Polıtseıler olardyń osyǵan uqsas basqa da qylmysqa qatysy bar-joǵyn tekserip jatyr.