Qaraǵandyda ózenge káriz sýyn tókken kommýnaldyq mekeme 4 mln teńge aıyppul tóleıdi

QARAǴANDY. KAZINFORM — Qaraǵandyda kommýnaldyq kásiporyn «Soqyr» ózenine káriz sýyn zańsyz tókkeni úshin aıyppulǵa tartyldy.

Belsendiler túsirgen beınejazbadan keıin ekologııa departamenti tekseris júrgizip, kásiporynnyń tabıǵatty qorǵaý normalaryn buzǵanyn anyqtady. Ekologtar tek aıyppul tóleýdi ǵana emes, sonymen qatar lastanǵan ózen arnasyn qalpyna keltirýdi talap etti.

Oblystyq ekologııa departamenti «Qaraǵandy sý» kásipornyn ákimshilik jaýapkershilikke tartty. Tekserý nátıjesinde birden birneshe bap boıynsha zańbuzýshylyq anyqtaldy: ekologııalyq aqparatty mindetti túrde usyný talaptaryn buzý (327-1-bap) jáne qorshaǵan ortaǵa áser etý normatıvterin asyrý (328-bap).

Sonymen qatar, Nura-Sarysý basseındik ınspektsııasy kásiporyndy 358-baptyń 2-bóligi boıynsha da jaýapqa tartqan.

Jalpy aıyppul 980 aılyq eseptik kórsetkishke teń, bul shamamen 3 853 360 teńgeni quraıdy.

— Ekologııa departamentiniń nusqamasyna sáıkes, ekologııalyq zalaldy óteý úshin remedıatsııa josparyn ázirledik. Barlyq is-shara belgilengen merzimde júzege asyrylatyn bolady, — dedi «Qaraǵandy sý» JShS.

Kommýnaldyq kásiporynǵa 2025 jylǵy 24 qarashaǵa deıin ózen arnasyn qalpyna keltirý baǵdarlamasyn ázirleý mindeti qoıyldy. Departamenttiń habarlaýynsha, bul másele qatań baqylaýda.

Oqıǵa qazan aıynyń ortasynda qoǵam nazaryn aýdarǵan edi. Qoǵam belsendisi Jumabaı Ysqaqov kásiporynnyń káriz qudyǵynan ózenge suıyqtyq aıdap turǵan sorǵyny túsirip, áleýmettik jelide jarııalaǵan bolatyn. Bul Fedorov sý qoımasynan nebári jarty shaqyrym qashyqtyqta bolǵan. Vıdeo áleýmettik jelilerde keń taralyp, úlken rezonans týǵyzdy. 

Kásiporyn ókilderi ol kezde qudyqtyń shamadan tys tolýynan osyndaı sharaǵa barýǵa májbúr bolǵandaryn jáne tazartý jumystaryn bastaǵandaryn málimdedi. Alaıda ekologtar bul áreketti tabıǵatty qorǵaý normalarynyń buzylýy dep baǵalady.