Qaraǵandyda qyzmetker ózi jumys isteıtin sulýlyq salonyn tonap ketti
ASTANA. KAZINFORM — Qaraǵandyda ózi jumys isteıtin sulýlyq salonynan aqsha urlaǵan qyzmetker sybaılasymen birge ustaldy.
Aldyn ala málimet boıynsha, salon qyzmetkeri jumys ornynyń ishki tártibin, jumys kestesin jáne aqsha qarajaty saqtalatyn oryndy jaqsy bilgen. Osy múmkindikti paıdalanyp, ol sybaılasymen aldyn ala sóz baılasyp, salonǵa zańsyz kirip, kassadaǵy aqshany jymqyrǵan.
— Qylmys sáti salonda ornatylǵan beınebaqylaý kameralaryna túsip qalǵan. Beınejazbalardy zerdeleý barysynda polıtsııa qyzmetkerleri kúdiktilerdiń áreketin anyqtap, olardyń jeke basyn jedel túrde anyqtaǵan, — delingen habarlamada.
Salon ıesi tańerteń jumysqa kelgen kezde aqshasynyń joǵalǵanyn baıqap, polıtsııaǵa habarlasqan.
Polıtsııa qyzmetkerleri kúdiktilerdi anyqtap, ustaýǵa baǵyttalǵan jedel-izdestirý is-sharalaryn júrgizdi. Nátıjesinde kúdiktiler qaladan shyǵyp ketýge áreket jasaǵan kezde temirjol vokzalynda ustaldy.
Qazirgi ýaqytta atalǵan fakti boıynsha qylmystyq is qozǵalyp, sotqa deıingi tergep-tekserý júrgizilip jatyr. Tergeý barysynda oqıǵanyń barlyq mán-jaıy anyqtalyp, keltirilgen zalal kólemi naqtylanady.
Eske salaıyq, buǵan deıin Astanada aýrýhananyń burynǵy qyzmetkeri naýqastyń altynyn urlap, lombardqa ótkizgenin jazǵanbyz.
