Qaraǵandyda órtke oranǵan úıden úsh bala qutqaryldy
ASTANA. KAZINFORM — Ulandyqtar órtenip jatqan úıden balalardy qutqaryp, erlik tanytty, dep habarlaıdy Polisia.kz.
QR ІІM Ulttyq ulany 6505 áskerı bóliminiń áskerı qyzmetshileri — Ashat Baıseıitov, Qydyrbaı Erlan, Vıacheslav Qojahmetov jáne Mıhaıl Býbnov Dolınka kentine qyzmetke bara jatyp, turǵyn úıdiń órtenip jatqanyn baıqaǵan. Oqıǵa ornyna shuǵyl jetken ulandyqtar janyp jatqan ǵımaratqa kirip, ishten úsh balany shyǵaryp alǵan. Áskerı qyzmetshiler balalardy evakýatsııalap qana qoımaı, janyp jatqan úıden jarylys qaýpin týdyrǵan 50 lıtrlik gaz ballondy da alyp shyqqan.
— Órtti kórgen boıda birden sol jerge júgirdik. Balalar jylap jatyr eken, tútinge býlyǵyp tynys alý da qıyndap ketken. Jaǵdaıdy ańǵaryp, bir sekýnd ta joǵaltpaý kerek ekenin túsindik. Biz úshin bul áreket batyrlyq emes — muny bizge kún saıyn úıretedi. Biz adamdardy qorǵaýǵa ant bergenbiz jáne kez kelgen jaǵdaıda sol antqa adal bolýǵa mindettimiz, — deıdi ulandyqtar.
Áskerı qyzmetshilerdiń jedel jáne sheshýshi áreketteri úlken qaıǵyly jaǵdaıdyń aldyn alýǵa múmkindik berdi.
Buǵan deıin ulandyqtar sý tasqynyna qarsy is-sharalarǵa belsendi qatysyp jatqany belgili boldy.