Qaraǵandyda órt saldarynan eki bala kóz jumdy

ASTANA. KAZINFORM - Qaraǵandyda órt saldarynan eki bala qaıtys boldy, taǵy eki bala jáne 60 jastaǵy áıel aýrýhanaǵa jetkizildi.

Qaıǵyly oqıǵa búgin túnde Qaraǵandy qalasyndaǵy Prıshahtınskaıa kóshesinde, eki páterli turǵyn úıde oryn alǵan. Órt shatyrdy jáne úıdegi jıhazdardy sharpyǵan. Qutqarýshylar kelgenge deıin 2017 jáne 2015 jyldary týǵan eki bala ózdiginen syrtqa shyǵyp, Balalar klınıkalyq aýrýhanasyna jetkizilgen.

Aldyn ala dıagnoz boıynsha zardap shekkender kómirtegi totyǵymen ýlanǵan. 

- Oqıǵa ornyna dereý jetken órt sóndirýshiler 1964 jyly týǵan áıeldi qutqardy, ol kómirtegi totyǵymen ýlaný jáne kúıik dıagnozymen H. Maqajanov atyndaǵy aýrýhanaǵa jatqyzyldy.

Sondaı-aq, qutqarýshylar 2020 jáne 2022 jyly týǵan eki balanyń denesin tapty, - dep habarlady Qaraǵandy oblysy TJD baspasóz qyzmeti. 

TJM kúshterimen jalpy aýdany 50 sharshy metr aýmaqty sharpyǵan órt tolyǵymen joıyldy.

Órttiń aldyn-ala sebebi – elektr symdarynyń qysqa tuıyqtalýy. Atalmysh derek boıynsha qylmystyq is qozǵaldy jáne saraptama taǵaıyndaldy.

Osyǵan deıin Aqmola oblysynda ótken jyly 29 órt tirkelip, 10 adam qaza bolǵanyn jazǵan bolatynbyz.