Qaraǵandyda Serik Sápıevke qatysty janjal boıynsha tergeý júrip jatyr

QARAǴANDY. KAZINFORM - Qaraǵandy qalasynda Olımpıada chempıony Serik Sápıevtiń dene jaraqatyn alýyna baılanysty janjalǵa qatysty sotqa deıingi tergeý bastaldy.

Oqıǵa 21 qańtar kúni oblystyq keshendi mamandandyrylǵan balalar men jasóspirimder sport mektebiniń aýmaǵynda bolǵan.

Aldyn ala aqparatqa sáıkes, eki er adam arasynda áýeli aýyzsha janjal týyndap, ol keıin tóbeleske ulasqan. Saldarynan Serik Sápıev dene jaraqatyn alǵan. Atalǵan derek boıynsha quqyq qorǵaý organdary «Soqqyǵa jyǵý» baby boıynsha qylmystyq isti tirkedi.

Atalǵan baptyń sanktsııasy aıyppul salýdy, qoǵamdyq jumystarǵa tartýdy nemese 25 táýlikke deıin ákimshilik qamaýǵa alýdy kózdeıdi.

Materıal jarııalanǵan ýaqytqa deıin Serik Sápıevten, sondaı-aq onyń orynbasary Daýren Esimhanovtan túsinikteme alý múmkin bolmady. Oqıǵaǵa qatysty resmı ustanym qandaı bolatyny ázirge belgisiz.

Qaraǵandy oblysy polıtsııa departamenti qylmystyq istiń qozǵalǵanyn rastady.

— Qaraǵandy qalasynyń 42 jastaǵy turǵynynyń aryzy negizinde soqqyǵa jyǵý deregi boıynsha sotqa deıingi tergeý bastaldy. 21 qańtar kúni qaladaǵy sport nysandarynyń birinde eki er adam arasynda janjal bolǵany anyqtaldy. Qazirgi ýaqytta polıtsııa qyzmetkerleri oqıǵanyń mán-jaıyn anyqtap jatyr, - dep málimdedi vedomstvonyń baspasóz qyzmeti.

Qaraǵandy oblysy deneshynyqtyrý jáne sport basqarmasynyń baspasóz qyzmeti bul oqıǵa boıynsha tergeý aıasynda málimdeme jasamaıtyndaryn jetkizdi. 

- Basshy da, onyń orynbasary da jumys ornynda qyzmetterin atqaryp otyr. Olardyń aýrýhanada jatqany týraly aqparat jalǵan, - dep habarlady baspasóz qyzmeti.

Polıtsııa ókilderiniń málimdeýinshe, tergeý múddesine baılanysty ózge aqparat jarııa etilmeıdi.

Aıta keteıik, Serik Sápıev — 2012 jylǵy Olımpıada oıyndarynyń chempıony, bokstan eki dúrkin álem chempıony, Qazaqstan Respýblıkasynyń eńbek sińirgen sport sheberi. Qazirgi ýaqytta ol Qaraǵandy oblysynyń dene shynyqtyrý jáne sport basqarmasyn basqarady.

Daýren Esimhanov basqarma basshysynyń orynbasary qyzmetin atqarady. Ol sambo jáne jaýyngerlik sambodan Azııa men álem chempıonattarynyń júldegeri, World Games kúmis júldegeri, sondaı-aq djıý-djıtsýdan álem chempıony retinde tanymal.

Osyǵan deıin Qaraǵandy oblysynda er adam eki dárigerdi soqqyǵa jyqqany týraly jazdyq.