Olımpıada chempıony Danııar Eleýsinovtiń jubaıyna qatysty sot úkimi shyqty

Qaraǵandy qalasynyń Álıhan Bókeıhan atyndaǵy aýdandyq sotynda Olımpıada chempıony, boksshy Danııar Eleýsinovtiń jubaıyna qatysty qylmystyq is qaraldy. Ol eki áıelge kúsh qoldanyp, dene jaraqatyn keltirdi dep aıyptalǵan. Іsti jan-jaqty qaraǵan sot aıyptalýshyny kináli dep tanyp, oǵan zańda kózdelgen jaza taǵaıyndady.

Tergeý materıaldaryna sáıkes, oqıǵa bıyl aqpan aıynda Maıqudyq yqshamaýdanyndaǵy turǵyn úılerdiń birinde bolǵan. Sol kúni sottalýshy ózimen bir podezde turatyn 81 jastaǵy atasyna qonaqqa kelgen. Qarııa kórshilerimen aradaǵy kelispeýshilik týraly aıtyp, olar aqsaqaldy balaǵattaıtynyn jetkizgen. Osydan keıin nemeresi máseleni ózi anyqtap almaq bolyp, kórshilerdiń páterine barǵan.

Jábirlenýshilerdiń aıtýynsha, keshki ýaqytta olardyń úıine basa kóktep kórshi qarııanyń nemeresi kelip, birden daýys kótere bastaǵan.

— Ol ózin tanystyrǵannan keıin birden bylapyt sózder aıtyp, maǵan aıqaılaı bastady. Ne bolyp jatqanyn, ne úshin kiná taǵyp turǵanyn túsinbedim. Artynsha ishimnen eki ret tepti, shashymnan ustap, jibermeı turdy. Barlyǵy kózdi ashyp-jumǵansha bolǵandyqtan, ne isterimdi de bilmeı qaldym, — dedi sotta jábirlenýshi Ásel.

Jábirlenýshilerdiń málimdeýinshe, janjal kezinde sottalýshynyń atasy da páterge kirgen. Olardyń aıtýynsha, ol da janjalǵa aralasyp, Áseldiń anasynyń basynan judyryqpen urǵan. Áıelder kútpegen qonaqtardy áreń degende syrtqa shyǵaryp, esikti japqanymen, olar biraz ýaqyt boıy esikti teýip, toqtaýsyz qaqqan.

Oqıǵadan keıin anasy men qyzy polıtsııaǵa aryz jazyp, medıtsınalyq kómekke júgingen. Sot-medıtsınalyq saraptamanyń qorytyndysyna sáıkes, zeınetker áıeldiń qol saýsaǵynyń sińiri úzilip, mıy jeńil shaıqalǵan. Al qyzynyń jumsaq tinderi zaqymdanǵan.
Sottalýshy ózine taǵylǵan aıypty moıyndaǵan joq. Onyń aıtýynsha, kórshilerine birneshe ret shaǵymdanǵan atasyn qorǵaý úshin barǵan jáne áreketin qajetti qorǵanys shegindegi is-áreket dep baǵalady.

— Atam kórshileri ony únemi qorlaıtynyn aıtty. Aramyzda sózge kelispeýshilik týyndaǵan kezde olar birinshi bolyp agressııa tanytty. Men tek ózimdi qorǵadym, — dedi ol sot barysynda.

Alaıda sot is boıynsha jınalǵan dálelderdi zertteı kele, qajetti qorǵanys týraly ýájder óz dálelin tappady degen qorytyndyǵa keldi.

— Sottalýshynyń kinási sot-medıtsınalyq saraptamalardyń qorytyndylarymen, jábirlenýshiler men kýálardyń aıǵaqtarymen jáne is boıynsha zerttelgen ózge de dáleldemelermen tolyq dáleldendi. Qajetti qorǵanys týraly aıtylǵan ýájderge synı baǵa berilip, olardyń istiń naqty mán-jaılaryna sáıkes kelmeıtini anyqtaldy, — dedi úkimdi jarııalaǵan Álıhan Bókeıhan atyndaǵy aýdandyq sottyń sýdıasy Baqtııar Aqanov.

Sot aıyptalýshyny Qazaqstan Respýblıkasy Qylmystyq kodeksiniń 109-baby 2-bóligi boıynsha kináli dep tanydy. Oǵan quqyq buzýshylyq jasalǵan kezdegi mólsher boıynsha 100 aılyq eseptik kórsetkish kóleminde, ıaǵnı 393 200 teńge aıyppul salyndy.

Budan bólek, sot aıyptalýshyny árbir jábirlenýshige moraldyq zalaldyń ótemaqysy retinde 500 myń teńgeden tóleýge mindettedi. Sondaı-aq jábirlenýshilerdiń ókiliniń zańgerlik qyzmetine jumsalǵan 1 mıllıon teńge shyǵyndy óteý júkteldi. Buǵan qosa, jábirlenýshiler emdelýge ketken shyǵyndy azamattyq is júrgizý tártibimen óndirip alýǵa quqyly.

Jábirlenýshilerdiń advokaty Nursultan Bıgojın sot úkimin uzaqqa sozylǵan tergeýdiń zańdy qorytyndysy dep baǵalady.

— Alty aı boıy kináli tulǵany qylmystyq jaýapkershilikke tartýǵa kúsh saldyq. Sot usynylǵan barlyq dáleldemeni jan-jaqty zerttep, zańdy ári negizdi sheshim qabyldady, — dedi advokat.

Sot otyrysynan keıin aıyptalýshy buqaralyq aqparat quraldaryna pikir berýden bas tartty. Sonymen qatar sot protsesi barysynda úkimge zańda belgilengen tártippen shaǵymdaný quqyǵyn paıdalanatynyn málimdedi.

Eske salaıyq, buǵan deıin Danııar Eleýsinovtiń ózi 20 táýlikke qamalyp, 7 jyl kólik júrgizý quqyǵynan aıyrylǵan edi.