Qaraǵandyda nóser jaýyn jaýyp, ondaǵan úı jaryqsyz qaldy

QARAǴANDY. KAZINFORM - Qaraǵandyda jaýǵan nóser jaýyn qalanyń ınfraqurylymyna edáýir salmaq túsirdi. Nóser jańbyrdan qaladaǵy birneshe kóshede jaryq sónip, ondaǵan úı elektr qýatynsyz qaldy. Qazir kommýnaldyq qyzmetter apat saldaryn joıý jumystaryn júrgizip jatyr.

Elektr qýaty 83-shi kvartal, Anjerskaıa, Lıpetsk, Bobrýıska, Entýzıasttar, Akademııalyq, Ermekov jáne ishinara Kramskoı kóshelerinde óshken.

Qala ákimi Meıram Qojýhovtyń aıtýynsha, aýa raıynyń kúrt buzylyp, nóser jaýynnan qaladaǵy birqatar qosalqy stantsııalarda tehnıkalyq aqaý tirkelgen.

– Qazir tutynýshylardyń bir bóligine jaryq berildi. Qala boıynsha qaıta qosý jumystary jalǵasyp jatyr. Osyǵan baılanysty keı jerlerde ýaqytsha qaıta sóndirýler bolýy múmkin – bul elektr qýatyn qaýipsiz qosý úshin qajet. Turǵyndardan túsinistik tanytýdy suraımyz, – dep jazdy ákim Instagram paraqshasynda.

Elektr jaryǵynyń ajyraýyna baılanysty qalanyń birneshe kóshesinde baǵdarshamdar isten shyqty. Jol qozǵalysyn retteý úshin keptelis baıqalǵan ýchaskelerge polıtsııa qyzmetkerleri jiberildi.

Qaladaǵy kommýnaldyq qyzmetter nóseraǵar júıesin tazalaý jáne jańbyr sýynyń tezirek aǵyp ketýine qatysty jumystaryn da qolǵa alǵan. Sý tolyp qalǵan jerlerde lıýkterdiń qaqpaqtary ashylyp, arnaıy sorǵy jabdyqtary iske qosyldy.

– Nóseraǵar júıeleri shtattyq rejımde jumys istep tur. Torlar men lıýkter ashyq – sý birtindep aǵyp jatyr. Degenmen jaýyn sýynyń tolyq ketýi úshin ýaqyt qajet. Sonymen qatar aýlalarda, jertólelerde nemese jeke úılerde sý jınalǵan jaǵdaıd, turǵyndardan bul týraly ótinish qaldyrýyn suraımyz – barlyq aqparat tıisti qyzmetterge joldanady. Jaǵdaı ákimdiktiń tolyq baqylaýynda, – dedi qala basshysy.

Osyǵan deıin Almatynyń kommýnaldyq qyzmeti nóser jańbyrǵa baılanysty kúsheıtilgen jumys rejımine aýystyrylǵany jaıly habarlaǵan bolatynbyz.