Qaraǵandyda náreste «saýdasyna» qatysty is boıynsha sot úkimi shyqty
QARAǴANDY. KAZINFORM — Qaraǵandyda jańa týǵan sábılerdi bıologııalyq anasynan balasy joq otbasylarǵa zańsyz berý isine qatysty rezonansty sot protsesi aıaqtaldy. Eki aıyptalýshy sot zalynda qamaýǵa alynsa, taǵy tórteýi shartty jaza aldy.
Rezonans týdyrǵan bul iske núkte qoıǵan úkimdi Qaraǵandy oblysynyń mamandandyrylǵan aýdanaralyq qylmystyq ister jónindegi sotynyń sýdıasy Dýlat Býrabaev shyǵardy.
Іs Qylmystyq kodekstiń 135-baby, 2-bóligi, 1-tarmaǵy boıynsha qaraldy. Tergeý nusqasyna sáıkes, «bala asyrap alý» rásimine qalalyq perzenthananyń medbıkesi kómektesken. Bastapqyda sábılerdi jańa otbasyna berý aqyly túrde júzege asqan bolýy múmkin degen boljam aıtylǵan. Alaıda aqsha berilgeni dáleldenbegendikten, is balalar saýdasy emes, kámeletke tolmaǵandardy zańsyz berý retinde qaıta saralandy.
Tergeý dereginshe, bıologııalyq ana 2022 jyly dúnıege kelgen qyzyn jáne 2023 jyly týǵan ulyn bosanǵannan keıin birden basqa adamdarǵa bergen. Bala dúnıege kelgen boıda týý týraly kýálikte bolashaq asyraýshy ákeniń atyna jazylyp, keıin onyń áıeli resmı túrde bala asyrap alý rásimin júrgizgen.
Memlekettik aıyptaýshy barlyq aıyptalýshylarǵa 8 jyldan 9 jylǵa deıin bas bostandyǵynan aıyrý jazasyn surady.
Alaıda sottalýshylar taǵylǵan aıypty moıyndamady. Bıologııalyq ana balalaryn satpaǵanyn, olardy jetimder úıine tapsyrmaı, meıirimdi otbasylarǵa bergenin aıtyp, bul qadamǵa jeke paıda kórý úshin emes, balalary aýqatty otasylarda qalaǵanyn jetkizdi.
Al «asyraýshy» ata-ana retinde tanylǵan erli-zaıyptylar sońǵy sózderinde balalarǵa bar meıirim men mahabbatyn berip jatqanyn aıtyp, olardy qazirgi otbasynda qaldyrýdy surady. Aıyptalýshylardyń aıtýynsha, balalar olardy týǵan ata-anasyndaı qabyldap ketken.
Sot barlyq mán-jaıdy eskerip, kelesideı úkim shyǵardy:
Eki erli-zaıypty 8 jylǵa shartty túrde sottaldy. Al bıologııalyq ana 5 jylǵa bas bostandyǵynan aıyryldy, perzenthanadaǵy medbıke 8 jylǵa ortasha qaýipsizdik deńgeıindegi mekemede merşimin óteıdi. Sońǵy ekeýi sot zalynda qamaýǵa alyndy.
Balalardyń ári qaraıǵy taǵdyryn, onyń ishinde bıologııalyq ananyń ózge balalarynyń bolashaǵyn bir aı ishinde qamqorshylyq organdar sheshýi tıis.