Qaraǵandyda múmkindigi shekteýli balaǵa merzimi ótken dári berilgen: anasy sotqa júginbek
QARAǴANDY. KAZINFORM — Qaraǵandyda 8 jastaǵy múmkindigi shekteýli balaǵa merzimi ótip ketken dári-dármek berilgeni belgili boldy. Balanyń anasy aýdandyq aýrýhananyń dárigerlerin sotqa bermek.
Áıeldiń aıtýynsha, onyń uly sırek kezdesetin mı aýrýy men epılepsııaǵa shaldyqqan. Bir jarym jyl boıy balada remıssııa bolǵan, alaıda bıyl mamyr aıynda kezekti talma ustamasy tirkelgen. Osy jaǵdaıdan keıin anasy balasyna berilgen «Depakın» shárbatynyń jaramdylyq merzimi ótip ketkenin anyqtaǵan.
Bul oqıǵaǵa qatysty málimet bergen oblystyq densaýlyq saqtaý basqarmasy preparattyń 2024 jyldyń 31 jeltoqsanynda jazylyp berilgenin aıtty. Basqarmanyń málimetinshe, balanyń anasy bul týraly 1414 qyzmeti arqyly ýaqytyly habardar etilip, oǵan birneshe márte telefon soǵylǵan.
— Balanyń anasy buryn berilgen dári-dármektiń jetkilikti ekenin aıtyp, ol kezde qosymsha preparat alýǵa muqtaj bolmaǵanyn jetkizgen. Al dári-dármekke ol tek 2025 jyldyń 23 mamyrynda júgingen. Dárini bergen ýchaskelik meıirbıke jaramdylyq merziminiń ótkenin baıqamaı qalǵan, — dep túsindirdi basqarma ókilderi.
Alaıda balanyń anasy munymen kelispeıdi.
— Kórshi kóshede turatyn, balamen úıde únemi otyratyn adamdy jeltoqsannan mamyrǵa deıin taba almaý, aqylǵa qonymsyz. Men balam úshin qajetti dárini almaı qalaı júrmekpin? Ata-ana dárihanadan nemese aýrýhanadan dári alsa, onyń jaramdy bolýyna senedi, — deıdi ol.
Oblystyq densaýlyq saqtaý basqarmasy oqıǵaǵa baılanysty qyzmettik tekserý júrgiziletinin málimdedi.
— Qyzmetker eńbek demalysynan shyqqan soń, tártiptik keńeste ýchaskelik meıirbıkeniń laýazymyna sáıkestigi qaralatyn bolady, — dedi vedomstvo ókilderi.
Sonymen qatar, basqarma jaǵdaı aýdandyq aýrýhana ákimshiliginiń baqylaýynda ekenin atap ótti.
— Qazirgi ýaqytta bala qajetti dárimen tolyq qamtamasyz etilgen. Jaǵdaı baqylaýda, — dep habarlady oblystyq densaýlyq saqtaý basqarmasy.
Premer-mınıstrdiń orynbasary Ermek Kósherbaevtyń tóraǵalyǵymen dárilik qamtamasyz etý júıesin reformalaý máseleleri boıynsha jumys keńesi barysynda dári-dármekpen qamtamasyz etýde júıeli zań buzý anyqtaldy.