Qaraǵandyda mektepke japsarlas jaı men jer teliminiń jekeshelendirilýi zańsyz tanyldy

QARAǴANDY. KAZNFORM - Qaraǵandyda jalpy bilim beretin mektepke japsarlas salynǵan eki qabatty nysan men oǵan tıesili 1 gektar jer teliminiń jekeshelendirilýi zańsyz dep tanyldy.

Іs Qaraǵandy oblysynyń mamandandyrylǵan aýdanaralyq ekonomıkalyq sotynda qaraldy. Daý týdyrǵan múlik memleket menshigine qaıtaryldy.

Sot materıaldaryna súıensek, 2000 jyly Qaraǵandy qalasynyń kommýnaldyq menshikti basqarý departamenti jumys istep turǵan mektepke japsarlas salynǵan eki qabatty ǵımaratty jekemenshik ýnıversıtetke 789 myń teńgege satqan. Saýda kelisimsharty jasalyp, nysan jańa ıesiniń ıeligine ótken.

Araǵa alty jyl salyp, 2006 jyly qala ákimdigi atalǵan japsarjaıdy paıdalaný úshin oǵan tıesili 1 gektar jer telimine jeke tulǵanyń atyna memlekettik akt bergen. Alaıda 2009 jyly bul qujat ózgertilip, jer paıdalanýshy retinde endi azamat emes, ýnıversıtet kórsetilgen. Kóp uzamaı ýnıversıtet pen jer qatynastary bólimi arasynda jer telimin satyp alý-satý týraly kelisim jasalady.

Memlekettik aýdıt nátıjesinde ýákiletti organ anyqtalǵan zańbuzýshylyqtar negizinde sotqa júginedi. Talap aryzda ýnıversıtetke, sondaı-aq memlekettik satyp alý, ekonomıka, jer qatynastary basqarmalary men qala ákimine qatysty mámileni jaramsyz dep taný suralǵan.

Talapker tarap jekeshelendirý kezinde Qazaqstan Respýblıkasy Prezıdentiniń «Jekeshelendirý týraly» jáne «Jer týraly» jarlyqtarynyń 5 jáne 8-baptary óreskel buzylǵanyn alǵa tartty.

Sot bul ýájderdi oryndy dep tapty. Azamattyq kodekstiń 158-babyna sáıkes, zańǵa qaıshy nemese quqyqtyq tártip negizderin buza otyryp jasalǵan mámile jaramsyz dep tanylýy múmkin.

Sonymen qatar «Jekeshelendirý týraly» Jarlyqtyń 8-baby boıynsha, memlekettik múlik tek memlekettik kásiporyn taratylǵan jaǵdaıda ǵana jeke menshikke berilýi múmkin. Al bul jaǵdaıda mektep jabylmaǵan, áli kúnge deıin jumys istep turǵan bilim berý mekemesi sanalady. Japsarlas qurylys jeke nysan retinde bólinbegen, mekteppen bir mekenjaıda ornalasqan jáne ortaq kadastrlyq nómirmen tirkelgen bólinbeıtin jer teliminde tur.

«Jer týraly» Jarlyqtyń 23-babyna sáıkes, eger jer telimi bólinbeıtin dep tanylsa, onda ony bólip berý nemese úlesin ajyratý múmkin emes.

Sot taraptardyń ýájderin tyńdaı kele, talap qoıý merzimi ótpegen degen sheshimge keldi. Sebebi, bul merzim zańbuzýshylyq anyqtalǵan kezden bastap esepteledi.

Nátıjesinde, mamandandyrylǵan sot 1 gektar jer telimi men japsarlas qurylysty satý týraly kelisimderdi jaramsyz dep tanydy. Qalalyq ákimdiktiń osy mámile negizinde shyǵarǵan qaýlylary da zańsyz dep tanylyp, kúshi joıyldy. Taraptar bastapqy quqyqtyq mártebesine qaıtaryldy.

Apellıatsııalyq alqa bul sheshimdi ózgerissiz qaldyrdy.

Eske salaıyq, Aqtóbe oblysynda búginge deıin 50 myńǵa jýyq jer telimi berilgeni jaıly jazǵan bolatynbyz.