Qaraǵandyda mas kúıde avtobýs júrgizgen júrgizýshi 7 jylǵa kýáliginen aıyrylýy múmkin
QARAǴANDY. KAZINFORM — Qoǵamdyq kólik tizgininde otyrǵan júrgizýshiniń alkogoldik mas kúıde bolǵany medıtsınalyq kýálandyrý kezinde rastaldy. Polıtseıler ony jaıaý júrginshige jol bermegeni úshin toqtatqan.
Qaraǵandyda polıtseıler № 29 baǵyt boıynsha qatynaıtyn Dong Feng avtobýsynyń 41 jastaǵy júrgizýshisin toqtatty. Ol Nazarbaev dańǵylyndaǵy baǵdarshammen rettelmeıtin jaıaý júrginshiler ótkelinde jol qozǵalysy erejesin buzyp, jaıaý júrginshige jol bermegen.
Tekserý barysynda júrgizýshiden alkogoldik masańdyq belgileri baıqalǵan. Medıtsınalyq kýálandyrý onyń kólikti mas kúıde basqarǵanyn rastady.
Polıtseılerdiń anyqtaýynsha, júrgizýshi buǵan deıin sońǵy aıaldamada jolaýshylardy túsirip úlgergen. Alaıda sodan keıin de avtobýspen baǵyt boıymen júrýin jalǵastyrǵan.
Oǵan qatysty Qazaqstan Respýblıkasynyń Ákimshilik quqyq buzýshylyq týraly kodeksiniń 608-babynyń 1-bóligi boıynsha ákimshilik hattama toltyryldy. Іs materıaldary sotqa joldandy.
Júrgizýshi 15 táýlikke ákimshilik qamaqqa alynyp, jeti jyl merzimge kólik quralyn basqarý quqyǵynan aıyrylýy múmkin.
Qaraǵandy oblysynyń polıtsııa departamenti kólikti alkogoldik masań kúıde basqarý jolaýshylardyń, jaıaý júrginshilerdiń jáne jol qozǵalysyna qatysatyn ózge de adamdardyń ómiri men densaýlyǵyna tikeleı qaýip tóndiretinin eske saldy.
Buǵan deıin Atyraýda arnaıy tehnıkamen soqtyǵysqan avtobýs ishindegi úsh jolaýshynyń zardap shekkeni habarlanǵan bolatyn.
