Qaraǵandyda mal urlyǵynyń aldyn alý maqsatynda mobıldi beketter qoıyldy
ASTANA. KAZINFORM — Mobıldik beketterdiń negizgi mindeti — et ónimderin tasymaldaıtyn kólikterdi tekserip, olardyń qujattarynyń zań talaptaryna sáıkestigin baqylaý, dep habarlaıdy Polisia.kz.
Qaraǵandy oblysynda mal urlyǵynyń aldyn alý jáne aýyl sharýashylyǵy taýar óndirýshileriniń múlkin qorǵaý maqsatynda 15 qyrkúıekten bastap respýblıkalyq jáne oblystyq mańyzy bar avtojoldarda 20 mobıldi beket jumysyn bastady.
Tekseris jumystaryna patrýldik polıtsııa, ýchaskelik ınspektorlar jáne krımınaldyq polıtsııa qyzmetkerleri jumyldyrylǵan. Bes kún ishinde tártip saqshylary 2 myńǵa jýyq avtokólikti tekserip, tasymaldanǵan et ónimderiniń qujattaryn baqylaýdan ótkizdi.
— Kúzgi soǵym maýsymynyń jaqyndaýyna baılanysty jaıylymnan mal urlyǵy jıileıtin kezeń. Sondyqtan mobıldik beketterdiń jumysy qylmystyń aldyn alýǵa baǵyttalyp otyr. Sharýa qojalyqtarynyń ıeleri men et tasymaldaýshylarǵa túsinistikpen qarap, polıtsııa qyzmetkerlerimen yntymaqtasýdy suraımyz, — dedi Qaraǵandy oblysy polıtsııa departamenti krımınaldyq polıtsııa basqarmasy bastyǵynyń orynbasary Meıirjan Slambekov.
Aıta keteıik, ótken jyly oblys aýmaǵynda mal urlyǵyna qatysty 25 derek tirkelip, 147 mal qoldy bolǵan. Onyń ishinde 64-i jylqy, 44-i iri qara, qalǵany usaq mal bolǵan. Júrgizilgen keshendi sharalardyń nátıjesinde 95 mal tabylyp, ıelerine qaıtaryldy.
Statıstıkaǵa súıensek, 19 jaǵdaıda mal jaıylymnan qaraýsyz júrgen jerden urlanǵan, al 6 derek mal qoradan qoldy bolý faktilerine qatysty. Sonymen qatar keshendi jedel-izdestirý is-sharalary barysynda 18 adamnan quralǵan 4 qylmystyq top ustalyp, olardyń zańsyz áreketterine tosqaýyl qoıyldy.
Budan buryn úsh óńirde mal urlyǵymen aınalysqan uıymdasqan qylmystyq toptar ustalǵanyn jazdyq.