Qaraǵandyda Qurban aıt kezinde qurban shalynatyn arnaıy oryndar belgilendi
QARAǴANDY. KAZINFORM — Qaraǵandy oblysynda Qurban aıt kúnderi qurban shalý rásimin ótkizýge arnalǵan arnaıy alańdar bekitildi. Óńirde merekelik baǵdarlama dinı rásimdermen birge mádenı is-sharalarmen jáne qashyqtan qatysýǵa múmkindik beretin onlaın-servıstermen qatar ótpek.
Bıyl Qurban aıttyń birinshi kúni 27 mamyrǵa sáıkes kelip otyr. Qaraǵandy oblysynda turǵyndardyń qurbandyq shalý rásimin oryndaýyna arnalǵan arnaıy oryndar aldyn ala anyqtalǵan.
Qaraǵandy oblysynyń bas ımamy Estaı Ábdiǵalı bul rásimniń tereń rýhanı máni bar ekenin atap ótti.
— Qurban shalý adamdy rýhanııatqa jaqyndatady. Múmkindigi bar adam úshin bul — mindetti amal, alaıda jaǵdaıy kelmegenderge ol júktelmeıdi, — dedi ol.
Onyń aıtýynsha, óńirde aıt namazy 27 mamyr kúni tańǵy saǵat 06:30–da oqylady. Namazdan keıin oblystyq «Ánet baba» meshitiniń aýlasynda ulttyq sport oıyndary men Qurban Fest — 2026 otbasylyq merekesi uıymdastyrylady. Qonaqtarǵa balalar alańdary, anımatorlar, foto aımaqtar jáne jármeńke usynylady.
Sonymen qatar oblystyń qalalary men aýdandarynda meshit aýmaqtarynda kıiz úıler tigilip, rýhanı-mádenı is-sharalar ótedi.
Qaraǵandy qalasynda qurban shalý rásimi ótetin arnaıy oryndar belgilendi:
* Reznık kóshesi, 18;
* N. Gogol kóshesi, 2/23 («Araı KZ»);
* S. Seıfýllın kóshesi, 53.
Budan bólek, áleýmettik jaǵdaıy tómen otbasylarǵa etti bólý jáne jetkizý boıynsha arnaıy shtab jumys isteıdi.
«Ánet baba» meshitiniń naıb ımamy Danııar Kemerbaev qurban shalý tek aıt namazynan keıin ǵana oryndalatynyn eske saldy.
— Islam adamǵa shamadan tys aýyrlyq júktemeıdi, sondyqtan qurbandyq úshin nesıe alý nemese otbasyn qıyn jaǵdaıǵa qoıý durys emes. Eger rásim namazdan buryn jasalsa, ol qabyl bolmaıdy. Al etti óz otbasyna qaldyrýǵa bolady, biraq ony týystarǵa jáne muqtaj jandarǵa taratý — saýapty is, — dedi ol.
Sondaı-aq onlaın rejımde qashyqtan qurban shalý qyzmeti jumysyn jalǵastyrady — QURBAN.MUFTYAT.KZ (https://qurban.muftyat.kz). Qyzmet aqysyn Kaspi QR arqyly tóleýge bolady, keıin rásimniń oryndalǵany týraly esep usynylady.
Eske salsaq, Astanada Qurban aıtta mal soıylatyn bes oryn belgilendi.
