Qaraǵandyda Kreşenıe kezinde 21 arnaıy shomylý orny TJD baqylaýynda bolady

QARAǴANDY. KAZINFORM — Qysqy Kreşenıe shomylýlary kezinde oblystyń sý aıdyndarynda qaýipsizdik sharalary kúsheıtildi. Qaýip-qaterdi azaıtý maqsatynda Tótenshe jaǵdaılar departamentiniń qyzmetkerleri, medıtsına qyzmetkerleri, polıtsııa jáne volonterler kezekshilik atqarady.

Qaraǵandy oblysynyń Tótenshe jaǵdaılar departamentinde «Kreşenıe» rásimin ótkizý kezinde qaýipsizdik máseleleri erekshe baqylaýda bolady. Bıyl departament kúshteri men tehnıkasy 21 arnaıy shomylý ornynda jumyldyrylmaq.

Mereke aldynda azamattyq qorǵaý qyzmetteri daıyndyq júrgizip, sýǵa túsý oryndaryn tekserip, kezekshilik uıymdastyryp, muz qalyńdyǵyn turaqty túrde ólshep otyr. Bul jumystar qazir de jalǵasyp jatyr.

Departament málimetinshe, oblys sý aıdyndaryndaǵy muzdyń ortasha qalyńdyǵy shamamen 50 santımetrdi quraıdy, bul is-sharalardy qaýipsiz ótkizýge jetkilikti. Qaýipsizdik talaptary boıynsha mınımaldy muz qalyńdyǵy — 10 sm bolýy tıis, al 15 sm-den assa qar motokólikterimen júrýge bolady, al muz ótkelderi úshin keminde 30 sm qalyńdyq qajet.

Qaýipsizdikti qamtamasyz etý úshin TJD qyzmetkerleri, polıtsııa, jedel-qutqarý jasaǵynyń sarbazdary, Jedel medıtsınalyq kómek jáne Órt medıtsınasy qyzmetkerleri, sondaı-aq eriktiler jumyldyryldy. TJD tikeleı sýda qaýipsizdikti qadaǵalaıdy, sonymen qatar adamdardyń bir jerde kóp jınalýyna jol berilmeıdi. Qoǵamdyq tártip polıtsııa qyzmetkerleri baqylaýynda bolady.

«Kreşenıe» rásiminiń qaýipsizdigin qamtamasyz etýge jalpy 238 adam jáne 93 tehnıka jumyldyrylǵan. Onyń ishinde TJD-dan — 91 adam jáne 31 tehnıka, jergilikti atqarýshy organdardan — 147 adam jáne 62 tehnıka.

Departament mamandary atap ótkendeı, keıbir turǵyndar shomylýdy tek kóńil kóterý retinde qabyldaıdy, alaıda bul ómir men densaýlyqqa qaýip tóndirýi múmkin.

— Sekirý arqyly sýǵa túsý muz astyna túsip ketýge nemese aǵyn alyp ketýine ákelýi múmkin. Júrek-qan tamyrlary aýrýlary bar adamdar úshin sýǵa daıyndyqsyz túsý asa qaýipti. Qutqarýshylar sýyq sýǵa túser aldynda deneni qyzdyryp, jeńil jattyǵý jasaýǵa, jyly kıim, súlgi, aýystyrylatyn aıaq kıim jáne ystyq shaıy bar termos daıyndaýǵa keńes beredi. Alkogol ishýge, sekirý nemese qıǵash túsýge, óz betinshe shomylý oryndaryn jasaýǵa tyıym salynady. Alǵash ret kelgenderge sýǵa birden basymen súńgip ketpeý usynylady — sýda 10–15 sekýnd bolý jetkilikti. Shomylǵan soń dereý qurǵaq súlgimen súrtinip, jyly kıim kıip, ystyq sýsyn ishý mańyzdy, — delingen habarlamada.

Qaraǵandy oblysynyń Tótenshe jaǵdaılar departamenti qaýipsizdik sharalarynyń basty sharty — tek arnaıy jabdyqtalǵan shomylý oryndarynda bolý ekenin erekshe atap ótti. Munda qutqarýshylar, medıtsına qyzmetkerleri jáne polıtsııa qyzmetkerleri kezekshilik etetin, qajet bolǵan jaǵdaıda jedel kómek kórsete alatyn qyzmetter uıymdastyrylǵan.

Eske salsaq, sınoptıkter aldaǵy kúnderi –38 gradýsqa deıin aıaz bolatynyn eskertken edi.