Qaraǵandyda kópqabatty turǵyn úıden órt shyǵyp, 35 adam qutqaryldy

ASTANA. KAZINFORM – Qaraǵandy qalasynda 10 qabatty turǵyn úıdiń jertólesinde elektr kabelderiniń órti tirkeldi. Qalyń tútin joǵarǵy qabattardaǵy turǵyndarǵa qaýip tóndirgen, dep habarlaıdy Tótenshe jaǵdaılar mınıstrligi.

Oqıǵa búgin Muqanov kóshesinde ornalasqan kópqabatty úıdiń jertólesinde bolǵan. Órt qatty tútinmen, ótkir ıispen jáne kireberiste tútinniń tez taralýymen qatar júrip, turǵyndardyń óz betinshe syrtqa shyǵýyn qıyndatqan.

- Oqıǵa ornyna kelgen TJD kúshteri jedel barlaý júrgizip, adamdardy qutqarýǵa jáne evakýatsııalaýǵa kiristi. Qutqarý qalpaqtaryn paıdalana otyryp, órt sóndirýshiler 15 adamdy, onyń ishinde 5 balany qutqardy. Sonymen qatar 20 adam, onyń ishinde 5 bala evakýatsııalandy, - delingen aqparatta.

Adamdardy jylytý úshin arnaıy vahtalyq avtobýs jumyldyrylǵan.

TJM málimetinshe, órt sóndirýshilerdiń der kezinde jáne kásibı áreketiniń arqasynda órt tolyq sóndirildi. Zardap shekkender joq.

Aıta keteıik, Іle-Alataý ulttyq parkindegi órtti sóndirýge tikushaq tartyldy.