Qaraǵandyda kólik ishinen áıeldiń máıiti tabyldy

QARAǴANDY. KAZINFORM – Qaraǵandy qalasynda turaqta turǵan avtokóliktiń ishinen birneshe jerinen pyshaqtalǵan áıeldiń máıiti tabyldy. Quqyq qorǵaý organdary qylmysqa qatysy bar degen kúdikpen er adamdy ustady.

Qaıǵyly oqıǵa 22 sáýir kúni Tólepov kóshesinde bolǵan. 34 jastaǵy áıeldiń denesi avtokóliktiń ishinen tabylǵan. Aldyn ala derekterge sáıkes, áıel pyshaq jaraqattarynan kóz jumǵan.

Oqıǵa týraly habar túsken boıda polıtsııa qyzmetkerleri jedel-izdestirý sharalaryn qolǵa aldy. Keshikpeı kúdik týdyrǵan 35 jastaǵy er adam anyqtalyp, ustaldy.

Qaraǵandy oblysy Polıtsııa departamentiniń málimetinshe, kúdikti ýaqytsha ustaý ızolıatoryna qamaldy.

– Atalǵan derek boıynsha «Adam óltirý» babymen qylmystyq is qozǵaldy. Jedel-izdestirý is-sharalarynyń nátıjesinde 35 jastaǵy kúdikti anyqtalyp, ustaldy jáne ýaqytsha ustaý ızolıatoryna qamaldy, – delingen vedomstvonyń resmı habarlamasynda.

Qazirgi ýaqytta sotqa deıingi tergeý amaldary júrgizilip jatyr. Oqıǵanyń mán-jaıy anyqtalyp jatyr, ózge aqparat tergeý múddesine baılanysty jarııa etilmeıdi.

Eske salsaq, osyǵan deıin Qaraǵandy oblysynda eki adamdy óltirdi degen kúdikke ilingen azamattyń máıiti tabylǵan bolatyn.