Qaraǵandyda qola dáýirinen orta ǵasyrǵa deıingi 25 eskertkish tabyldy
ASTANA. KAZINFORM — Mamyr aıynda Saryarqa arheologııalyq ınstıtýtynyń ǵalymdary Shet aýdanynda izdestirý-barlaý jumystaryn júrgizip, 25 jańa tarıhı-mádenı mura eskertkishin tapty, dep habarlaıdy Qaraǵandy oblysynyń ákimdigi.
Bul tarıhı eskertkishterdiń negizgi bóligi — ártúrli dáýirge jatatyn jeke qorǵandar men tutas qorymdar. Ázirge egjeı-tegjeıli zertteýsiz olardyń naqty jasyn anyqtaý múmkin emes.
Alaıda, ózine tán belgileriniń jıyntyǵy boıynsha ǵalymdar tabylǵan eskertkishterdiń úsh dáýirge — qola dáýirine, erte temir dáýirine jáne orta ǵasyrǵa jatatynyn anyqtaı aldy.
— Barlyq tabylǵan eskertkishter týraly biz jergilikti atqarýshy organdarǵa resmı túrde habarlaýymyz kerek. Al olar bul oryndardy kúzetke alýǵa tıis. Tek osydan keıin ǵana odan ári zertteýler, qazbalar júrgizýge bolady. Bul protsess jyldam jasalatyn dúnıe emes, biraq biz osy qorymdarda qazba jumystaryn júrgizemiz. Jumystar Shet aýdanynyń aýmaǵyn ǵasyrlar buryn mekendegen adamdardyń ómirin tolyqtyrýǵa jáne jaqsy túsinýge kómektesedi, — deıdi Saryarqa arheologııalyq ınstıtýtynyń dırektory Alekseı Kýkýshkın.
Ekspedıtsııa músheleri sondaı-aq buryn tabylǵan Shunaq petroglıfterin zerttedi. Ǵalymdar jıi kezdesetin sıýjetterdi sıpattap, petroglıfterdiń eń qyzyqty úzindilerin sýrettedi. Mamandar petroglıfterdiń negizgi bóligi qola dáýirine jatady degen qorytyndyǵa keldi. Buǵan sol kezeńniń dástúrli sıýjettik qatary dálel bola alady — tutas, adoranttar, solıarlyq belgiler, jabaıy ógizder, arbalar, arshaly jylqylar, juldyzdy aspan.
Buǵan deıin habarlanǵandaı, Almatyda memleket qorǵaýyna alynǵan qansha eskertkish bar ekeni anyqtaldy.