Qaraǵandyda qoǵamdyq qaýipsizdikti robot-ıt kúzetip júr
ASTANA. KAZINFORM – Qaraǵandy qalasynda qoǵamdyq tártipti baqylaýǵa arnalǵan robot-ıt pılottyq rejımde synaqtan ótkizilip jatyr.
Joba qoǵamdyq oryndardy patrýldeý jáne qaýipsizdikti qamtamasyz etý maqsatynda qolǵa alynǵan.
Mamandardyń aıtýynsha, zamanaýı qurylǵy beınebaqylaý jáne beınetaldaý júıelerimen jabdyqtalǵan. Robot adamdardyń júzin tanyp, izdeýde júrgen nemese habar-osharsyz ketken azamattardy derekqor arqyly anyqtaı alady.
«Sonymen qatar keshen avtokólikterdiń memlekettik tirkeý nómirlerin tirkep, alynǵan aqparatty operatorlarǵa jiberedi», – delingen habarlamada.
Robot táýliktiń kez kelgen ýaqytynda jumys isteýge beıimdelgen. Ol jaryq shamdarymen, arnaıy sıgnaldarmen jáne daýys zoraıtqyshpen jabdyqtalǵan. Sondaı-aq ártúrli jyldamdyq rejıminde qozǵalyp, patrýldeý júrgize alady.
Synaq jumystary Qaraǵandy qalasynyń Ortalyq saıabaǵynda ótkizildi. Jańa tehnologııa qala turǵyndarynyń qyzyǵýshylyǵyn týdyrǵan.
Testileý kezeńi aıaqtalǵannan keıin mamandar júıeniń tıimdiligin baǵalap, ony odan ári paıdalaný máselesin qarastyrady.
Aıta keteıik, buǵan deıin Aqtaýda qoǵamdyq qaýipsizdikti robot-ıtter kúzetetini habarlandy.
