Qaraǵandyda keı páterge jylý nege áli jetpedi
QARAǴANDY. KAZINFORM — Qaraǵandyda jylý berý maýsymy bastalǵanymen, keıbir turǵyn úılerdegi páterler áli de tolyq jylynǵan joq. Qazir qalada turǵyndardan túsken ótinishter qaralyp, jylý qubyrlarynda jınalǵan aýany shyǵarý, jylytý júıesin retteý jáne úılerdiń ishindegi aqaýlardy joıý jumystary júrgizilip jatyr.
Qaraǵandyda ortalyqtandyrylǵan jylý júıesine 2 695 kóppáterli turǵyn úı men áleýmettik salanyń 266 nysany qosylǵan. Qalalyq qyzmetterdiń málimetinshe, barlyq turǵyn úı men áleýmettik nysanǵa jylý jetkizilgen.
Alaıda jylýdyń úıge deıin berilýi páterdiń birden jylyp ketýin bildirmeıdi. Qala ákimdiginiń málimetinshe, keıbir úılerde jylý qubyrlarynda jınalǵan aýany shyǵaryp, úı ishindegi jylytý júıesin retteý qajet. Al jekelegen páterlerden aqaý anyqtalǵan jaǵdaıda mamandar tıisti jóndeý jumystaryn júrgizip jatyr.
Máseleniń taǵy bir bóligi turǵyndardyń nemese vedomstvolyq uıymdardyń qaraýyndaǵy jylý jelileriniń jekelegen ýchaskelerine qatysty. Mundaı jaǵdaıda da jylý júıesin qosymsha retke keltirý jumystary qajet.
— Qazir bizdiń basty mindetimiz — jylý berýdiń bastalǵany týraly esep berý ǵana emes, ár turǵynnyń ótinishin jedel qarap, máseleni naqty sheshý. Eger páterde sýyq bolsa, onyń naqty sebebin — úı ishindegi jylytý júıesiniń jaǵdaıynan bastap, páterdiń ózindegi aqaýǵa deıin — anyqtap, ony MIB, PIK jáne retteý qyzmetiniń mamandarymen birlesip joıý qajet, — dedi Qaraǵandy qalasynyń ákimi Meıram Kojýhov.
Ákimdik málimetinshe, turǵyndardyń ótinishteri MIB nemese PIK ókilderimen jáne «Teplotranzıt» JShS-niń retteý qyzmeti mamandarymen birlesip qaralady. Mamandar jylýdyń berilmeýine nemese páterdiń jetkilikti deńgeıde jylynbaýyna ne sebep bolǵanyn anyqtap, qajetti sharalardy qabyldaýy tıis.
Eger batareıalar sýyq bolsa nemese tıisti deńgeıde jylymasa, turǵyndar dıspetcherlik qyzmetterge habarlasa alady.
«Teplotranzıt» JShS-niń dıspetcherlik qyzmetteri:
Ortalyq jedel-dıspetcherlik qyzmet — 56-17-79
Sovet eksplýatatsııalyq aýdany — 42-22-26
Ońtústik-Shyǵys eksplýatatsııalyq aýdany — 77-50-04
Oktıabr eksplýatatsııalyq aýdany — 45-21-92
Kırov eksplýatatsııalyq aýdany — 53-05-65
Temirjol eksplýatatsııalyq aýdany — 47-29-60
Retteý qyzmeti — 56-51-05
Aýdan ákimdikteriniń dıspetcherlik qyzmetteri:
Qazybek bı atyndaǵy aýdan — 41-42-46
Álıhan Bókeıhan atyndaǵy aýdan — 37-06-42
Buǵan deıin Qaraǵandy oblysynda jylý berý maýsymy kezeń-kezeńimen bastalǵany habarlanǵan bolatyn. 2 qazandaǵy málimet boıynsha, 756 áleýmettik nysan men 1 661 kóppáterli turǵyn úıge jylý berilgen.
