Qaraǵandyda kenshilerden aqsha bopsalaǵan qylmystyq top ustaldy
Qaraǵandy oblysy polıtsııa departamentiniń uıymdasqan qylmysqa qarsy kúres basqarmasy prokýratýranyń úılestirýmen “Qarmet” kenshilerinen qorqytý, moraldyq jáne fızıkalyq qysym kórsetý arqyly aqsha bopsalaýmen aınalysqan qylmystyq toptyń múshelerin ustady, dep habarlaıdy Kazinform Polisia.kz-ke silteme jasap.
Jedel-izdestirý is-sharalaryn júrgizý barysynda toptyń osyndaı 15 faktige qatysy bar ekeni anyqtaldy. Sonymen qatar qylmystyq toptyń qatysýshylary qarýlardy qoldanyp, krımınaldyq janjaldarǵa qatysqan jáne atalǵan oblystyń Abaı aýdanyna qarasty temirjol stantsııasynda tasymaldanatyn júkterdi urlaǵan.
Kúdikti adamdardy ustaý barysynda 15-ke jýyq tintý is-sharalary júrgizildi, sonyń nátıjesinde tirkelmegen atys jáne sýyq qarýlar, sondaı-aq oq-dáriler men dinı ádebıetter tárkilendi. Barlyǵy 10 adam ustaldy, olardyń ishinde toptyń kóshbasshysy men eń belsendi tórt múshesi qamaýǵa alyndy.
– Qazirgi ýaqytta qylmystyq top músheleriniń basqa da osyndaı qylmystarǵa qatysy bar-joǵy tekserilýde. Qylmystyq is Qaraǵandy oblysy polıtsııa departamenti tergeý basqarmasymen tergelýde. Qylmystyq protseske qatysýshylardyń múddeleri úshin sotqa deıingi tergep-tekserýdiń basqa málimetteri jarııa etilmeıdi, – dedi QR ІІM uıymdasqan qylmysqa qarsy kúres departamentiniń ókili Qýandyq Alpys.
