Qaraǵandyda qatty jel 5 kólikti zaqymdady
QARAǴANDY. KAZINFORM — Qatty jeldiń saldarynan Qaraǵandyda aǵashtar qulap, avtokólikter zaqymdandy. Qulaǵan aǵashtar men butaqtardy jınap, joldar men aýmaqtardy tazartý jumystary júrgizilip jatyr.
Búgin Qaraǵandyda 23 aǵashtyń qulaǵany tirkeldi. Onyń 18-i Álıhan Bókeıhan aýdanynda, taǵy beseýi Qazybek bı aýdanynda qulaǵan.
Saldarynan bes avtokólik zaqymdandy. Zardap shekkender joq.
Qaraǵandy ákimdiginiń málimetinshe, qulaǵan aǵashtardyń basym bóligi iri ári kópjyldyq aǵashtar bolǵan. Olardyń arasynda qýraǵan aǵashtar bolmaǵan. Aǵashtar qatty jel ekpinine shydas bermeı qulaǵan.
— Kelip túsken barlyq ótinish boıynsha mamandar jedel jumys júrgizip jatyr. Qulaǵan aǵashtar men butaqtar kesilip, shyǵarylýda, joldar men aýmaqtar tazartylýda. Aǵashtar ınjenerlik kommýnıkatsııalardyń kúzet aımaqtarynda ornalasqan jerlerde jumystar qaýipsizdik talaptaryn saqtaı otyryp, tıisti qyzmettermen birlesip júrgiziledi, — dep habarlady qala ákimdiginen.
Ákimdik málimetinshe, qulaǵan aǵashtardyń edáýir bóligi kondomınıým nysandarynyń aýmaǵynda, sondaı-aq jylý jáne elektrmen jabdyqtaý jelileriniń kúzet aımaqtarynda bolǵan.
Buǵan deıin Qaraǵandy turǵyndaryna aýa raıynyń qolaısyzdanatyny jáne qatty jel soǵatyny týraly 112 júıesi arqyly eskertý jiberilgen. Bul týraly Qaraǵandy oblysynyń Tótenshe jaǵdaılar departamenti de SMS habarlamalar arqyly turǵyndarǵa málimdegen.
Qala ákimdigi qatty jel kezinde qaýipsizdik sharalaryn saqtaýǵa shaqyrady. Turǵyndarǵa aǵashtardyń, elektr berý jelileriniń jáne ornyqsyz qurylymdardyń mańynda júrmeý usynylady. Avtokólikterdi múmkindik bolsa ashyq ári qaýipsiz jerlerge qoıǵan jón.
Buǵan deıin 6 qazanda Qazaqstannyń birqatar óńirinde aýa raıy kúrt nasharlaıtyny boljanǵany habarlanǵan bolatyn.
