Qaraǵandyda qarııany uryp-soqqan jasóspirimderge qatysty istiń aıyptaý aktisi oqyldy
QARAǴANDY. KAZINFORM – Qaraǵandy oblystyq sotynda Temirtaýda jasóspirimderge qatysty rezonansty qylmystyq is qaralyp jatyr. Búgingi sot otyrysynda prokýror aıyptaý aktisin jarııa etti. Aıyptalýshylarǵa «kúsh qoldaný arqyly toptasyp tonaý» baby boıynsha aıyp taǵylǵan.
Іs materıaldaryna sáıkes, byltyr jazda Temirtaýda birneshe jasóspirim egde jastaǵy er adamǵa shabýyl jasaǵan. Tergeý nusqasy boıynsha, olar aldyn ala kelisip, jábirlenýshiniń jeke zattary men aqshasyn ıemdenýdi josparlaǵan.
Aıyptaý aktisinde top músheleriniń rólderi aldyn ala bólingeni atap ótildi: bireýi aınalany baqylaǵan, ekinshisi jábirlenýshige jaqyndaǵan, al qalǵandary oqıǵa ornynan qashyp ketýge kómektesken. Shabýyl nátıjesinde er adam jaraqat alyp, keltirilgen materıaldyq shyǵyn edáýir bolǵany kórsetildi.
Prokýratýra aıyptalýshylardyń áreketin «kúsh qoldaný arqyly toptasyp jasalǵan tonaý» baby boıynsha saralady. Solardyń biri qylmys jasalǵan sátte kámelet jasyna tolmaǵan, bul sotta jeke mán-jaı retinde qaralyp otyr.
Búgingi otyrys barysynda sýdıa aıyptalýshylarǵa sottaǵy tártipti buzǵany úshin eskertý jasady.
Sonymen qatar jábirlenýshi densaýlyǵyna baılanysty protseske qatysa almady. Qarııanyń qorǵaýshysy medıtsınalyq anyqtama usyndy. Alaıda aıyptalýshylardyń advokattary onyń onlaın qatysýyn surap, sot bul ótinishti qanaǵattandyrdy.
Qazir sot tergeýi jalǵasyp jatyr. Kelesi otyrysta kýágerlerden jaýap alý jáne aıǵaqtardy zertteý josparlanyp otyr.
Eske salsaq, polıtsııa qyzmetkerleri Shyǵys Qazaqstan oblysynda jasóspirimder arasynda qylmys jasaǵandar sany kúrt kóbeıgeni týraly málimdegen bolatyn.