Qaraǵandyda qaraqshylyq shabýyl men urlyq jasaǵan er adam ustaldy
ASTANA. KAZINFORM — Qaraǵandyda polıtseıler qaraqshylyq shabýyl men urlyq jasady degen kúdikpen 30 jastaǵy qala turǵynyn jedel túrde qolǵa túsirdi.
Polıtsııanyń habarlaýynsha, kúdiktiniń áreketi birneshe qylmystyq epızodqa qatysy bar ekenin tergeý barysynda anyqtaldy.
Oqıǵa dúısenbi kúni kúndiz bolǵan. 67 jastaǵy qala turǵyny dúkennen úıine qaıtyp kele jatqanda, artynan júgirip kelgen beıtanys er adam onyń moınyndaǵy altyn alqany julyp alyp, izin sýytqan. Jábirlenýshi keltirilgen materıaldyq shyǵyndy 400 myń teńgege baǵalady.
— Zeınetker birden polıtsııaǵa habarlasyp, kúdiktiniń syrtqy kelbetin egjeı-tegjeıli sıpattap bergen. Jedel áreket etken tártip saqshylary alynǵan baǵdar boıynsha kúdiktiniń jeke basyn jáne júrgen jerin qysqa merzimde anyqtap, ony ustady, — dep habarlady polıtsııa.
Ustalǵan azamat óz kinásin tolyq moıyndady.
Onyń aıtýynsha, urlanǵan altyn alqany lombardqa ótkizip úlgergen. Alaıda polıtsııa qyzmetkerleri zergerlik buıymdy aıǵaqty zat retinde tárkilep, qaıtaryp aldy.
Tergeý barysynda kúdiktiniń bul qylmysqa aldyn ala daıyndalmaǵany, biraq oǵan deıin velosıped urlaǵany belgili boldy.
Urlanǵan velosıpedpen kele jatyp, moınynda altyn alqasy bar zeınetkerdi baıqap, kólikti jaqyn mańdaǵy aýlalardyń birine qaldyrady. Sodan keıin áıelge shabýyl jasap, altyn alqasyn julyp alyp, qaıtadan velosıpedke minip, oqıǵa ornynan qashyp ketken. Qazirgi ýaqytta urlanǵan velosıpedtiń zańdy ıeleri anyqtalyp, óz múlkin tanydy.
Kúdikti sotqa deıingi tergep-tekserý kezeńine ýaqytsha ustaý ızolıatoryna qamaldy. Polıtseıler onyń osyǵan uqsas ózge de qylmystarǵa qatysy bar-joǵyn tekserip jatyr.
