Qaraǵandyda ınvestorlarǵa negizsiz qarjylyq sanktsııalar qoldanylǵan
ASTANA. KAZINFORM – Qaraǵandy oblysynyń prokýratýrasy úsh ınvestorǵa qatysty negizsiz qarjylyq aýyrtpalyqtardy azaıtyp, alaıaqtyqtan zardap shekken kompanııanyń múddesin qorǵaý boıynsha sharalar qabyldady.
Máseleler oblys prokýrorynyń respýblıkalyq INVEST CARAVAN aktsııasy aıasynda ınvestorlarmen kezdesýinen keıin sheshilgen. Kásipkerler «Saran» respýblıkalyq mańyzy bar ındýstrııalyq aımaǵynda ınvestıtsııalyq jobalardy júzege asyryp jatyr.
Jumys sapary barysynda prokýratýra bıznes ókilderiniń ótinishterin qarap, ýákiletti memlekettik organdar men tabıǵı monopolııalar sýbektileriniń áreketteriniń zańdylyǵyn teksergen.
Máselelerdiń biri «Tengri Tyres» JShS men «Silk Road Electronics» JShS ınvestorlaryna júrgizilgen qarjylyq esepteýlerge qatysty boldy.
Tekserý barysynda tabıǵı monopolııa sýbektisi elektr energııasyn tutyný lımıtterinen asyp ketkeni úshin qosymsha eseptelgen somalardy negizsiz arttyrǵany anyqtaldy. Sonyń saldarynan ınvestorlarǵa qarjylyq sanktsııalar qoldanylǵan.
– Prokýratýranyń aralasýynan keıin qaıta esepteý júrgizildi. Nátıjesinde qosymsha eseptelgen somalar men aıyppul sanktsııalary edáýir tómendetildi. Bul ınvestorlarǵa negizsiz qarjylyq shyǵyndarǵa jol bermeýge múmkindik berdi, – delingen prokýratýra habarlamasynda.
Taǵy bir másele «Karaganda Insulation» JShS-ǵa qatysty bolǵan. Kompanııa jabdyq jetkizý jónindegi syrtqy ekonomıkalyq shartty oryndaý kezinde alaıaqtyqqa tap bolǵan.
Tergeý barysynda alaıaqtyq shemasy elektrondyq hat-habarlardy qoldan jasaý jáne ónim berýshiniń tólem derektemelerin aýystyrý arqyly júzege asqany anyqtaldy. Sonyń saldarynan ınvestor qarajatty ózgertilgen derektemeler boıynsha aýdaryp jibergen.
Valıýtalyq retteý salasyndaǵy zańnamaǵa sáıkes kompanııaǵa shetel valıýtasyn repatrıatsııalaý mindeti júktelgen. Alaıda ınvestorǵa qatysty jasalǵan qylmys saldarynan bul talapty oryndaý obektıvti túrde qıyndaǵan.
Buǵan deıin kompanııanyń polıtsııaǵa bergen ótinishteri birneshe ret rastalmaǵan dep tanylyp, esepten shyǵarylǵan. Qylmystyq istiń tirkelmeýi ınvestordyń ulttyq jáne shetel valıýtasyn repatrıatsııalaý talabyn oryndamaǵany úshin jyl saıyn ákimshilik jaýapkershilikke tartylý qaýpin týǵyzǵan.
Yqtımal aıyppul kólemi repatrıatsııalanbaǵan valıýta somasynyń 20%-yn, ıaǵnı 20 myń eýrodan astam somany quraǵan.
Osy jaǵdaılardy eskere otyryp, prokýratýra alaıaqtyq deregin Sotqa deıingi tergep-tekserýlerdiń biryńǵaı tizilimine tirkedi.
Nátıjesinde INVEST CARAVAN aıasynda úsh ınvestordyń buzylǵan quqyqtary qalpyna keltirilip, negizsiz qarjylyq aýyrtpalyqtar azaıtyldy jáne alaıaqtyqtan zardap shekken ınvestordyń múddesin qorǵaý sharalary qabyldandy.
INVEST CARAVAN prokýratýra organdary men ınvestorlardyń tikeleı ózara is-qımyl jasaý tetikteriniń biri sanalady. Ol ınvestıtsııalyq jobalardy iske asyrýǵa kedergi keltiretin ákimshilik tosqaýyldar men ózge de máselelerdi jedel anyqtap, sheshýge baǵyttalǵan.
Investorlardy súıemeldeý jáne olardyń quqyqtaryn qorǵaý jumysy Qaraǵandy oblysy prokýratýrasynyń turaqty baqylaýynda.
Aıta keteıik, Shymkentte ınvestorlarǵa kedergi keltirgen sheneýnikter aıyppul arqalady.
