Qaraǵandyda ınternet-dúken atyn jamylyp, 461 adamdy aldaǵan áıelder sottaldy
QARAǴANDY. KAZINFORM — Qaraǵandyda 461 adamdy aldap, 700 mln teńgeden astam shyǵyn keltirgen eki áıelge sot úkimi shyqty. Olar Qytaı men Túrkııadan taýarlar, jıhaz, turmystyq tehnıka jáne avtokólikterdi arzan baǵamen jetkizip berýge ýáde bergenimen, tapsyrystardy oryndamaǵan.
Qaraǵandy qalasynyń Qazybek bı aýdandyq sotynyń málimetinshe, sottalýshylar WhatsApp messendjerinde taýarlardy tıimdi baǵamen satý úshin toptar ashqan. Satyp alýshylardyń senimine kirý maqsatynda olar tapsyrystar jetkizildi dep jalǵan pikirler jarııalaǵan.
Keıin áıelder naryqtaǵy baǵadan áldeqaıda arzan jıhaz, turmystyq tehnıka jáne avtokólikterdi jarnamalaı bastaǵan. Taýarlardy ilgeriletý úshin bógde adamdardyń pikirleri túsirilgen beınejazbalardy paıdalanǵan.
Satyp alýshylardan tapsyrys pen aqsha qabyldaǵannan keıin sottalýshylar taýarlardy jetkizýge ýáde bergen. Alaıda olar óz mindettemelerin oryndaýdy tipti oılamaǵan. Sonyń saldarynan 461 adam zardap shegip, keltirilgen jalpy shyǵyn 700 mln teńgeden asty.
Áıelderdiń kinási jábirlenýshiler men kýágerlerdiń aıǵaqtary, WhatsApp toptaryndaǵy hat almasýlar men jarııalanymdar, bank shottaryndaǵy aqsha qozǵalysy týraly málimetter jáne sotta zerttelgen ózge de dálelder arqyly rastaldy.
Prokýror sottalýshylardyń árqaısysyn 6 jyl 8 aıǵa bas bostandyǵynan aıyrýdy jáne jazany óteýdi bir jylǵa keıinge qaldyrýdy surady. Bul rette áıelderdiń biriniń jeti balasy, al ekinshisiniń kámeletke tolmaǵan balasy bary eskerildi.
Jábirlenýshiler qatań jaza taǵaıyndaýdy jáne keltirilgen shyǵyndy óteýdi talap etti. Al sottalýshylar óz kinálaryn moıyndamady. Qorǵaý tarapy olardy aqtaýdy surady.
Sot úkimimen eki áıeldiń árqaısysy 6 jyl 8 aıǵa bas bostandyǵynan aıyryldy. Alaıda jazany óteý bir jylǵa keıinge qaldyryldy. Sot jazany jeńildetetin sebep retinde sottalýshylardyń kámeletke tolmaǵan balalary bar ekenin eskerdi. Qylmystyq jaýaptylyq pen jazany aýyrlatatyn mán-jaılar anyqtalmaǵan.
Jábirlenýshilerdiń azamattyq talaptary ishinara qanaǵattandyryldy. Sottalýshylardan 700 mln teńgeden astam shyǵyn óndirip alý týraly sheshim qabyldandy.
Úkim zańdy kúshine engen joq.
Eske salsaq, Astanada marketpleıs júrgizý boıynsha oqytý qyzmetin usynyp, alaıaqtyq jasaǵan áıel sottaldy.
