Qaraǵandydaǵy jarylystan eki adam mert boldy
QARAǴANDY. KAZINFORM — Qaraǵandy oblysyndaǵy dámhanadaǵy gaz ballonynyń jarylysynan keıin aınala órtke orandy. Órt sóndirýshiler tilsiz jaýdy 300 sharshy metr aýmaqta sóndirdi. Munda eki adam mert boldy. Bul týraly QR Tótenshe jaǵdaılar mınıstrliginiń Telegram kanalynda jarııalandy.
Gaz ballony jarylysynyń aldyn ala sebebi anyqtaldy. Dámhanada gazben jabdyqtaý júıelerin, onyń ishinde turmystyq gaz ballondaryn qaýipsiz paıdalaný talaptary buzylǵan.
Bir qabatty ǵımaratta bolǵan jarylystan shamamen 200 sharshy metr aýmaqta jabyn konstrýktsııalary qulady. Qazir úıindilerdi ashý jumystary júrgizilip jatyr.
— Naqty málimet boıynsha oqıǵa saldarynan eki adam qaza taýyp, 11 adam jaraqat aldy. Olar aýdandyq aýrýhanaǵa jetkizildi. Qutqarýshylar zaqymdanǵan qurylymdardy tekserip, qaıta órtenýdiń aldyn alý sharalaryn qabyldap jatyr, — delingen aqparatta
Qaraǵandy oblysynda túnde jol boıyndaǵy dámhanada gaz ballony jaryldy.