Qaraǵandyda esirtki taratýmen aınalysqan kúdikti ustaldy

QARAǴANDY. KAZINFORM — Qaraǵandy qalasynda júrgizilgen jedel-izdestirý is-sharalarynyń nátıjesinde esirtki qylmysyna qarsy is-qımyl bóliminiń qyzmetkerleri 40 jastaǵy jergilikti turǵyndy ustady. Bul týraly QR ІІM habarlady.

Ol psıhotroptyq zattardy zańsyz taratýmen aınalysqan degen kúdikke ilindi. 

Kúdiktini ustaý barysynda onyń janynan shamamen 100 gramm untaq tárizdi, esirtkige uqsas zat salynǵan polıetılen paket tabyldy. Sonymen qatar qara ızolentaǵa oralǵan, ishinde krıstall tárizdi zaty bar eki orama anyqtaldy.

— Ustalǵan turǵyn polıtseılerge qosymsha jasyrylǵan oryndardy kórsetip, sol jerlerden taǵy 7 dál osyndaı orama tabyldy. Saraptama qorytyndysyna sáıkes, tárkilengen zattardyń barlyǵy mefedron bolyp shyqty, — delingen aqparatta.

Tártip saqshylary kúdiktini ustaǵan kezde minez-qulqynyń ózgerýin baıqap, medıtsınalyq kýálandyrý júrgizdi. Saraptama nátıjeleri onyń A-PVP jáne mefedron psıhotroptyq zattaryn qoldanǵanyn rastady.

Atalǵan derek boıynsha kúdiktige qoǵamdyq orynda esirtkilik mas kúıde júrgeni úshin ákimshilik hattama toltyryldy.

Sondaı-aq asa iri mólsherde esirtki jáne psıhotroptyq zattardy saqtaý deregi boıynsha qylmystyq is qozǵaldy. Tergeý amaldary kezeńinde kúdikti ýaqytsha ustaý ızolıatoryna qamaýǵa alyndy.

Qaraǵandy oblysynda osyǵan deıin esirtki taratý jáne kontrabandamen aınalysqan turǵyn sottaldy.